VOV4.Êđê - Hruê kăm êgao, Knơ̆ng bruă sang čư̆ êa čar Gia Lai mkŏ mjing klei bi kƀĭn ksiêm wĭt bruă knuă 9 mlan, pŏk ngă bruă klam 3 mlan knhal jih thŭn. Klah čŭn klei bi kƀĭn, Khua Knơ̆ng bruă sang čư̆ êa čar Gia Lai mtă kơ phung hlăm Knơ̆ng bruă sang čư̆ êa čar, dŭm knơ̆ng, dhar bruă, bi đru hlăm klei pŏk ngă mđrăm mbĭt, hdră msir čiăng bi leh dŭm hnơ̆ng kčah, bruă klam mđĭ kyar bruă duh mkra - ala ƀuôn, rơ̆ng klei êđăp ênang thŭn 2022.

Blŭ hlăm klei bi kƀĭn, Nguyễn Hữu Quế, khua kiă kriê knơ̆ng bruă hdră êlan leh anăn duh bi liê čar Gia Lai brei thâo: Gia Lai jing sa hlăm dŭm alŭ wăl mâo klei brei čan duh bi liê bruă knŭk kna jing êmưt êdi. Hlăm anăn, Êpul kriê dlăng hdră duh bi liê mkŏ mkra čar leh anăn dŭm knơ̆ng bruă, dhar bruă jing dŭm anôk bruă klam ngă dŭm hdră kñăm, mâo ngăn prăk lu - mâo hnơ̆ng brei čan ƀiă hĭn. Hră hưn mdah Êlan Dar bruă duh mkra nah Ngŏ (ênoh prăk duh bi liê 1.200 êklai prăk) ară anei knŏng mrâo bi leh hră mơar, mprăp klei bi lông blei klei ngă bruă, hdră mkra êlan Phù Đổng (ƀuôn prŏng Pleiku) srăng lŏ wĭt ksiêm dlăng hră mơar. Êngao kơnăn, bruă dŭm alŭ wăl ngă êmưt klei ba jao anôk ala ăt ngă klei hmăi kơ bruă hluê ngă dŭm hdră mkăp. Nguyễn Hữu Quế, khua kiă kriê knơ̆ng bruă hdră êlan leh anăn duh bi liê čar Gia Lai ăt bi klă hŏng hdră mkra êlan Nguyễn Chí Thanh (ƀuôn prŏng Pleiku) leh anăn êlan hluh kdriêk Čư̆ Sê-Čư̆ Pưh-Čư̆ Prông (kdrêč êlan găn kdriêk Čư̆ Pưh: “Êlan Nguyễn Chí Thanh, ƀuôn prŏng Pleiku ka mâo jao sa met ôh čiăng kơ êpul kriê dlăng hdră mkăp hluê ngă. Êpul kriê dlăng dôk ngă bruă ti dŭm kdrêč êlan amâo mâo klei kpăk. Amâodah jing kdriêk Čư̆ Pưh, klă anăp kâo jing khua êpul nao ksiêm dlăng, mtrŭt mjhar kdriêk ruh mgaih 1,3km ti wăl krah Nhơn Hoà. Khua bruă sang čư êa kdriêk Čư̆ Pưh bi klă srăng tla čih kơ 50 gŏ sang, bi adôk 34 gŏ sang jao kơ êlan dơ̆ng mrô 14 ăt ka dưi ba jao mơh.”

Hluê si Nguyễn Hữu Quế, phŭn agha ngă truh klei brei čan êmưt mơ̆ng bruă mprăp kơ dŭm hdră mâo klei êmưt, dleh kpăk hlăm klei ngă hră mơar knŭk kna leh anăn klei tla čiu, ruh mgaih anôk ala. Ƀiădah, hŏng lu hdră kčưm pŏk ngă hlăm wưng tlâo mlan tal 4, klei brei čan duh bi liê srăng hmar. Wưng kơ anăp, phung duh bi liê srăng lŏ dơ̆ng mtrŭt mđĭ phung ngă bruă ăt msĕ hŏng hluê ngă kjăp dŭm hdră bhiăn hlăm klei bhiăn ala čar kơ bruă duh bi liê mkŏ mkra čiăng rơ̆ng klei brei čan djŏ hŏng hdră kčah.

Hruê mmông êgao, knơ̆ng bruă hdră êlan leh anăn duh bi liê mâo leh klei kčĕ hŏng bruă sang čư êa čar Gia Lai ba mdah lu hră mơar gĭt gai kơ phung duh bi liê mtrŭt bi hmar bruă brei čan leh anăn mkŏ mjing 4 êpul ngă bruă kñăm ksiêm dlăng, mtrŭt mjhar, ruh mgaih klei dleh dlan kñăm bi hmar klei brei čan duh bi liê bruă knŭk kna thŭn 2022. Ară anei, hnơ̆ng brei čan duh bi liê bruă mkŏ mkra hlăm čar mâo 31% giăm knar hŏng hnơ̆ng kah knar kluôm ala.

Bi kơ hnư knŭk kna hrui wĭt, ară anei hnư knŭk kna hrui wĭt mơ̆ng čar jing 4.100 êklai prăk, hrŏ 30.7% mkă hŏng wưng anei thŭn dih. Nguyễn Anh Dũng , Khua kiă kriê knơ̆ng bruă ngăn prăk čar Gia Lai brei thâo, mta phŭn jing čar dôk tuôm hŏng klei dleh dlan hlăm bruă hrui mă prăl yua lăn hŏng lu hdră mkăp. Nguyễn Anh Dũng ăt bi êdah dŭm hdră êlan mđĭ hĭn klei hrui wĭt ngăn prăk knŭk kna hlăm dŭm mlan knhal jih thŭn:“Hmei bi êdah hŏng bruă sang čư êa čar kñăm gĭt gai dŭm knơ̆ng bruă, dhar bruăm anôk bruă ksiêm dlăng dŭm hdră duh bi liê mâo yua lăn, čiăng bi leh dŭm mta hră mơar iêo mthưr klei duh bi liê, dưn yua klei găl, rơ̆ng prăk hrui wĭt. Mta phŭn tal 2, hmei bi mguôp hŏng anôk bruă jia ksiêm dlăng hnư hrui wĭt hlăm 3 mlan knhal jih thŭn čiăng rơ̆ng hdră kčah ngăn prăk thŭn 2022”.

Êngao kơ dŭm boh klei kơ bruă duh bi liê bruă knŭk kna leh anăn ênoh knŭk kna hrui wĭt, klei kƀĭn bruă sang čư êa čar Gia Lai ăt bi êdah lu boh klei čiang mgaih msir mkăn msĕ si: mkŏ wĭt wăl duh bi liê, klei mmơ̆ng ngă hlăm ana pla mjing leh anăn klei ruă hlăm mnơ̆ng rông, hdră krŭ wĭt leh anăn mđĭ kyar bruă duh mkra, mnia mblei boh mnga… Blŭ hlăm klei kƀĭn, Trương Hải Long, khua bruă sang čư êa čar Gia Lai mtă kơ dŭm knơ̆ng, dhar bruă, alŭ wăl hlăm čar bi mguôp, hluê ngă mtam dŭm hdră êlan, kñăm bi leh dŭm mta kñăm, bruă duh mkra ala ƀuôn thŭn 2022 hlăm čar:“Kñăm hluê ngă dŭm mta phŭn dôk êmưt mkă hŏng hdră kčah leh anăn ba mdah dŭm hdră êlan ruh mgaih klei dleh dlan, dŭm klei dôk mâo hlăm dŭm mta bruă: hnư knŭk kna hrui wĭt, brei čan duh bi liê bruă mkŏ mkra, dŭm hdră mkăp, hdră krŭ wĭt bruă duh mkra, ala ƀuôn, bruă mdrao mgŭn, hdră yua lăn ti alŭ wăl, mkra mjing mnia mblei, klei mnơ̆ng ngă ana pla mjing, klei ruă hlăm mnơ̆ng rông, klei ngă soh hŏng klei bhiăn ala čar. Khua kiă kriê dŭm anôk bruă, dhar bruă, alŭ wăl, khua bruă sang čư êa dŭm kdriêk, wăl krah mjêč hluê ngă dŭm bruă klam mơ̆ng phung k’iăng khua bruă sang čư êa čar bi êdah leh”.

Khua bruă sang čư êa čar Gia Lai ăt mtă kơ phung hgŭm bruă sang čư êa čar, dŭm knơ̆ng bruă, dhar bruă, anôk bruă, alŭ wăl hrăm mbĭt bi mguôp, ktang phĭt gĭt gai, gĭr ktưn, bi đru hdơ̆ng pô hlăm bruă hluê ngă hră mlbĭt dŭm bruă klam, hdră êlan čiăng bi leh dŭm mta kñăm, hdră čah, bruă klam mđĭ kyar bruă duh mkra ala ƀuôn, rơ̆ng klei êđăp ênang thŭn 2022.

                                                                        VOV Tây Nguyên – Y Ƀel pô mblang