VOV4.Êđê- Thŭn 2022, êoh prăk duh bi liê kluôm hlăm čar jing 3.350 êklai prăk. Truh akŏ mlan 5, čar mâo bi liê leh giăm 400 êklai prăk. Knơ̆ng bruă sang čư̆ êa čar Gialai mkŏ mjing leh êpul mtrŭt mjhar bruă duh bi liê ngăn prăk kluôm kơ thŭn 2022 mơ̆ng sa čô k’iăng khua knơ̆ng bruă sang čư̆ êa čar nga khua êpul, lehanăn khua knơ̆ng bruă čuăl mkă lehanăn duh bi liê jing k’iăng khua êpul. Knơ̆ng bruă sang čư̆ êa čar Gialai mtă leh kơ knơ̆ng bruă čuăl mkă lehanăn duh bi liê bi mguôp hŏng dŭm knơ̆ng dhar bruă bi ksiêm dŭm êpul bruă lehanăn alŭ wăl ngă êmưt bruă rŭ mkra, êmưt hlăm klei bi liê ngăn prăk kơ bruă knuă, čiăng lŏ mâo hdră êlan mă bruă bi djŏ hĭn; mtă kơ phung khua kiă kriê dŭm kdriêk, wăl krah, ƀuôn prŏng kiă kriê bi kjăp, pral ruh mgaih jih klei dleh dlan klei gun kpăk kơ bruă ruh mgaih anôk ala, klei čiu hnô lehanăn mbĕ anôk dôk mrâo, pral mgaih msir klei bi kčŭt, mjing klei bi sa ai hlăm phung ƀuôn sang êjai nga bruă knuă. Jih jang klei duh bi liê, hlăm grăp hrue kăm mâo klei hâo hưn kơ bruă knuă mă, kơ klei bi liê ngăn prăk kơ mdê bi bruă dôk ngă./.

Pô mblang: Y-Khem Niê