VOV4.Êđê - Aguah mbruê 3/6, ti ƀuôn prŏng Pleiku, Bruă sang čư êa čar Gia Lai mkŏ mjing leh knăm mtrŭt mjhar mlan ngă bruă kyua phung hđeh čar Gia Lai thŭn 2022. Hŏng akŏ “Hrăm mbĭt răng mgang phung hđeh, mâo klei blŭ gang mkhư̆ klei ngă măk ƀai kơ phung hđeh” mlan ngă bruă kyua phung hđeh thŭn anei ti čar Gia Lai mkŏ mjing truh kơ jih hruê 30/6 kñăm mđĭ hĭn klei thâo săng, klei thâo kơ phung hđeh, gŏ sang, yang ƀuôn kơ bruă hrăm mbĭt rang mgang phung hđeh, pŏk dŭm adŭ hriăm mtô kơ phung hđeh dŭm klei thâo hlăm klei hdĭp, klei thâo răng mgang, gang mkhư̆ klei ngă măk ƀai, klei kpĕ êka leh anăn dŭm boh klei djŏ tuôm.

Êngao kơnăn, mlan ngă bruă kyua phung hđeh ti čar Gia Lai lŏ mđing truh kơ bruă rơ̆ng wưng mdei prŏng êđăp ênang, jăk mơak hŏng lu mta bruă mtô mjuăt bi hriăm, hlăp lêñ. Iêu mthưr dŭm êpul êya, grăp čô, hrăm mbĭt sa ai hŏng keh prăk đru kơ phung hđeh mâo klei hdĭp dleh dlan, awăt êdu.

Y-Ƀel  pô mblang