VOV4.Êđê - Hrue mbrue (29/3), kdriêk Čư̆ Sê, čar Gialai mkŏ mjing leh klei čang ênuh, lehanăn ba dơr klang kleh 2 čô phung êngia asei, ka thâo klă ôh anăn, mâo duah ƀuh hlăm war sa gŏ sang ti alŭ Phú Cường, să Ia Pal. Leh knăm čang ênuh mâo mkŏ mjing ti knơ̆ng bruă sang čư̆ êa să Ia Pal, snăn ba dơr klang kleh anei ti msat phung êngiă asei kdriêk Čư̆ Sê. Hŏng ai êwa klei mpŭ, Phung khua kiă kriê dŭm gưl bruă Đảng, bruă sang čư̆ êa alŭ wăl, êpul lĭng kahan, lehanăn phung ƀuôn sang hlăm kdriêk nao mđup brei mnga, čuh brui mngưi bi êdah ai tiê hdơr knga hŏng phung săn leh asei mlei djiê êngiă hlăm bruă răng mgang lăn car.

Êlâo anăn, hrue 26/3, Knơ̆ng bruă sang čư̆ êa să Ia Pal hmư̆ klei hưn mơ̆ng gŏ sang ti alŭ Phú Cường, să Ia Pal dôk čuk hli pioh rŭ mdơ̆ng sang. Snăn anôk bruă djŏ tuôm kdriêk Čư̆ Sê truh mtam mkŏ mjing bruă kuai mă klang kleh dua čô phung djiê êngiă. Bi mkă hŏng klei phung ƀuôn sang hưn, lehanăn jih jang mnơ̆ng duiñ ti anôk kuai klang snăn bi klă anei jing klang phung kahan djiê êngiă hlăm ênuk bi blah, lehanăn mkŏ mjing bruă mka dlăng AND djŏ hŏng mta mtrŭn./.

Y-Khem pô mblang