VOV4.Êđê - Aguah 1/6, Knơ̆ng bruă dhar kreh mjuăt ktang asei mlei leh anăn hiu čhưn ênguê čar Gia Lai bi hgŭm hŏng dŭm anôk bruă djŏ tuôm mkŏ mjing Knăm mphŭn pŏk hruê Olimpic hđeh điêt leh anăn pŏk ngă jih jang mnuih ƀuôn sang hriăm luê êa, gang mkhư̆ klei djiê mngăt hlăm êa thŭn 2022. Knăm mphŭn pŏk mâo êbeh 200 čô knuă druh, phung mă bruă knŭk kna, lĭng kahan, êdam êra leh anăn phung hđeh sang hră nao hgŭm.

Hluê si Knơ̆ng bruă dhar kreh - mjuăt ktang asei mlei - hiu čhưn ênguê Gia Lai, klei djiê mngăt hlăm êa jing mta phŭn mrô sa ngă kơ phung hđeh ti čar djiê. Mơ̆ng akŏ thŭn 2021 truh ară anei, kluôm čar mâo 39 klei, ngă 42 čô hđeh sang hră djiê, ba klei ênguôt hnĭng hlăm lu gŏ sang. Hlăm knăm mphŭn pŏk, phung hđeh dưi mkăp klei thâo leh anăn ktrâo lač dŭm boh phŭn: klei thâo dŏng hdĭp sĭt mngăt hlăm êa, tuôm hŏng klei truh jhat…

H’ Zawut pô mblang