Sang mnia să Ia Hla (kdriêk Chư Pưh, čar Gia Lai) rŭ mdơ̆ng mơ̆ng thŭn 2020 leh anăn ba yua mơ̆ng thŭn 2021, hŏng ênhă êbeh 430 m2. Hdră bruă mkra mjing kjăp hŏng djăp ênŭm pui kmlă, êa, kdrp gang mkhư̆ truih mdjiê klei pui ƀơ̆ng…

Sang mnia mâo 40 anôk čhĭ mnơ̆ng hlăm lam sang leh anăn 24 anôk čhĭ mnơ̆ng mtah mâo čuôr kơup. Leh 4 thŭn mkŏ mjing ƀiădah amâo dưi ba yua ôh, lu anôk jhat rai leh, rơ̆k rung čăt jŭm dar. Ti anăp boh klei sang mnia lui huâng ƀiădah ti dŭm anôk êlan ktlah mtlâo, mpă lŏ čhĭ   mnia lu, luč êđăp ênang hlăm êlan klông, Knơ̆ng bruă sang čư̆ êa să Ia Hla mkŏ mjing leh êpul hâo hưn, mtrŭt mjhar phung mnia blei hŏng dŭm êpul bruă đru kčĕ, msir mgaih klei ngă soh hŏng boh klei ksĭng mmiă djiêu êlan čhĭ mnia.