VOV4.Êđê- Bruă duh mkra ala ƀuôn čar Gia Lai 9 mlan thŭn 2022 mâo lu klei bi knăl krŭ wĭt hmar. Hlăm anăn ênoh knơ̆ng bruă mrâo mkŏ mjing leh anăn boh tŭ iêo thưr duh bi liê mâo klei kdlưn hĭn. Mơ̆ng akŏ thŭn truh kơ ară anei, čar Gia Lai mâo êbeh 740 knơ̆ng bruă mkŏ mjing mrâo, đĭ 17% mkă hŏng wưng anei thŭn dih, hŏng kluôm ênoh prăk bi klă êbeh 7.400 êklai prăk. Kơ klei iêo mthưr duh bi liê, bruă sang čư êa čar Gia Lai bi klă leh hdră duh bi liê kơ 6 hdră mkăp, ênoh êbeh 600 êklai prăk.

15 hdră mkăp mkăn mâo ênoh êbeh 3.400 êklai prăk dưi bi leh hdră mơar, čar dôk ksiêm dlăng. Hluê si Nguyễn Hữu Quế, khua kiă kriê knơ̆ng bruă hdră êlan leh anăn duh bi liê čar Gia Lai, čiăng kơ wăl duh bi liê klă mngač, mtăp mđơr hĭn, čar dôk mtrŭt mđĭ mlih mrâo klei ngă hră mơar knŭk kna, mbĭt anăn ktang phĭt hrui wĭt dŭm hdră amâo mâo ngă djŏ msĕ hŏng klei ƀuăn.

Pô mblang: Y-Ƀel Êban