VOV4.Êđê - Hrue mbrue (4/7), Êpul kiă kriê bruă Đảng čar Gialai gưl 16 (2020 – 2025) mkŏ mjing leh klei bi kƀĭn tal 8 pŏk mlar. Klei bi kƀĭn pioh leh mmông ksiêm wĭt, lehanăn mă klei blŭ kơ dua klei čih mkra klei hâo mdah kơ bruă bi hrŏ ƀun pral lehanăn kjăp hlăm mnuih djuê ƀiă wưng thŭn 2017 – 2020 lehanăn tă hdră truh kơ thŭn 2025.

Klei hâo mdah ksiêm wĭt 3 thŭn hlue ngă hdră mtrŭn kơ bruă kriê pioh ana êa drao hlăm čar Gialai truh thŭn 2025, lehanăn tă hdră truh kơ thŭn 2030. 5 thŭn êgao hlue ngă hdră mtrŭn 05-NQ/TU, bruă bi hrŏ ƀun hlăm mnuih djuê ƀiă mâo leh dŭm gưl bruă Đảng, bruă sang čư̆ êa dŭm gưl ti Gialai yap jing bruă phŭn kơ klei mđĭ kyar klei hdĭp mda ala ƀuôn. Hnơ̆ng ênoh gŏ êsei ƀun hlăm kluôm čar hrŏ 12,59%, hlăm mnuih djuê ƀiă hrŏ 26,31%, kdlưn hĭn hŏng ênoh kčah. Kơ hdră mtrŭn kriê pioh ana êa drao hlăm čar Gialai truh thŭn 2025, lehanăn tă hdră truh kơ thŭn 2030, čar mâo leh lu hdră êlan jăk. Hlăm anăn lu alŭ wăl jing leh krĭng phŭn bruă pla mjing ana êa drao, ba wĭt leh klei tŭ dưn prŏng. Mâo dŭm mta bruă tal êlâo brei ƀuh klei tŭ dưn, lehanăn pŏk hdră êlan ngă bruă jăk hĭn đru sa kdrêč kơ bruă bi hrŏ ƀun kơ phung ƀuôn sang. Mơ̆ng anăn, truh thŭn 2030, Gialai ktưn pla mrâo hlăm brô 20 êbâo ha ana êa drao./.

Y-Khem pô mblang