VOV4.Êđê- Gia Lai dôk mŭt hlăm wưng yan bhang thu krô, adiê mđiă sui ngă kơ lu ênhă dliê huĭ srăng mâo klei pui ƀơ̆ng. Čiăng mđing kơ hdră gang mkhư̆ klei pui ƀơ̆ng dliê, dŭm alŭ wăl čih mkra lehanăn pŏk leh lu hdră  kñăm mdrơ̆ng hŏng klei anei.

Phung ƀuôn sang ƀuôn Ngăng, să Čư̆ Don, kdriêk Čư̆ Pưh mâo tŭ mă phăn jao êbeh 600ha dliê mơ̆ng Anôk bruă kiă kriê dliê Nam Phú Nhơn. Ară anei, adiê mđiă hlơr không sui, snăn hlăm dliê ênưih snăk lĕ hlăm klei pui ƀơ̆ng. Čiăng dưi gang mkhư̆, snăn ƀuôn Ngăng mbha jao leh kơ dŭm gŏ êsei nao ksiêm dlăng nanao dliê, mâo hdră cih hwai tir bi doh dliê. Gru, jing sa hlăm dŭm gŏ êsei mâo tŭ mă phăn jao răng mgang dliê mơ̆ng ƀuôn Ngăng, să Čư̆ Don, kdriêk Čư̆ Pưh brei thâo:

“Jing leh gŏ êsei tŭ mă phăn jao kiă kriê dliê, ară anei ƀuôn hmei mâo truh 22 gŏ êsei tŭ mă kiă kriê êbeh 600 ha dliê. Hiu nga bruă hlăm dliê mbĭt hŏng phung ƀuôn sang, snăn mđĭ ai jih jang mnuih brei thâo răng kriê dliê, amâo mâo hiu duah druôm kyâo, kăn dua jah ênah ngă hma rei. Yan bhang không snăn pô mbĭt hŏng jih jang mnuih bi nao ktir roh dliê, jah waih rơ̆k rung, gang mkhư̆ hiu kơ klei pui ƀơ̆ng dliê”.

Anôk bruă kiă kriê dliê Nam Phú Nhơn hlăk dôk kiă kriê êbeh 15 êbâo ha dliê. Dơ̆ng mơ̆ng akŏ yan bhang leh mtam, êpul bruă anei mâo jao leh kơ knuă druh, mnuih ngă bruă kreh hiu suang dlăng, păn kjăp alŭ wăl, čŏng mkŏ mjing 4 hdră kơ anăn, lehanăn mkŏ mjing dŭm êpul gang mkhư̆ klei pui ƀơ̆ng dliê.

Nguyễn Văn Tường, Khua anôk bruă kiă kriê dliê kyâo Nam Phú Nhơn, kdriêk Čư̆ Pưh brei thâo, ênhă dliê mơ̆ng anôk bruă kiă kriê dôk hlăm dua alŭ wăl jing kdriêk Čư̆ Pưh, lehanăn kdriêk Čư̆ Sê. Ară anei anôk bruă hlue ngă leh jih jang bruă răng kơ klei pui ƀơ̆ng dliê. Hlăm anăn sa kdrêč prŏng jing dôk hlăm kngan phung ƀuôn sang đru răng kriê, msĕ si nao bi ktir hwai djah djâo rơ̆k rung, kñăm čiăng dưi mkhư̆ huĭdah mâo klei pui ƀơ̆ng dliê:

“Snăn hlăm jih jang ênhă mâo phăn jao kơ phung ƀuôn sang kiă kriê hŏng klei jăk leh sơăi, mơ̆ng anăn mơh đru mđĭ ênoh hrui wĭt kơ phung ƀuôn sang, kah knar hlăm grăp gŏ êsei mâo tŭ mă phăn jao hlăm sa mlan mâo ba wĭt giăm 1 êklăk prăk. Ayŏng adei gĭr bi mđĭ ai hdơ̆ng găp hgao hĕ klei dleh dlan, kñăm čiăng bi leh bruă čuăn. Mâo klei bhiăn hgŭm plah wah êpul bruă kiă kriê dliê kyâo, hŏng bruă sang čư̆ êa alŭ wăl gưl să, Anôk bruă kiă kriê dliê dŭm gưl tơdah mâo hĕ bruă mjêč, mâo hdră mă bruă hlăm wưng, mlan snăn bi mâo hdră mă bruă mbĭt hiu suang êwăng čiăng dưi hrăm mbĭt bi đru hŏng anôk bruă kiă kriê dliê”.

Mnuih ƀuôn sang čuh rơ̆k rung gang mkhư̆ pui ƀơ̆ng dliê

Čư̆ Pưh ară anei mâo êbeh 20 êbâo ha dliê, hlăm wăl êngao jing dŭm čuê ênưih lĕ hlăm klei pui ƀơ̆ng, mâo yap leh jing êbeh 6 boh să mâo: Ia Hla; Ia Hrŭ; Ia Phang; Ia Le; IA Blư̆; Čư̆ Don. Phạm Văn Đạo, Khua anôk bruă kiă kriê dliê kyâo kdriêk Čư̆ Pưh lač, mơ̆ng akŏ yan bhang không leh mtam, êpul bruă mâo leh jih hdră ngă bruă kơ klei gang mkhư̆ huĭdah mâo klei pui ƀơ̆ng dliê, mđrăm mbĭt hŏng dŭm êpul răng mgang klei pui ƀơ̆ng dliê dŭm kdriêk să, mkŏ mjing hdră êlan mă bruă, mkŏ mjing êpul hiu bi gak răng, gang mkhư̆ klei pui ƀơ̆ng dliê. Mkŏ mjing ngă klei ƀuăn rơ̆ng mâo mbha leh truh 2 êbâo 400 pŏk hră ƀuăn rơ̆ng, mbha hră rup truh 800 pŏk kơ dŭm gŏ êsei hdĭp giăm dliê... Mơ̆ng anăn hâo hưn mtrŭt mjhar phung ƀuôn sang mđĭ hĭn klei thâo săng gang mkhư̆ klei pui ƀơ̆ng dliê. Phạm Văn Đạo, Khua anôk bruă kiă kriê dliê kyâo kdriêk Čư̆ Pưh, lač:

“Anôk bruă ksiêm dlăng djăp alŭ wăl truh lehanăn ngă leh mơh klei hâo mdah mơ̆it kơ knơ̆ng bruă sang čư̆ êa kdriêk, knơ̆ng bruă lŏ hma bi nao ksiêm dlăng kơ bruă răng mgang, huĭ kơ klei pui ƀơ̆ng dliê ti kdriêk Čư̆ Pưh jing jăk, mâo mprăp êmiêt leh djăp ênŭm. Snăn hlăm thŭn leh êgao, kdriêk Čư̆ Pưh amâo mâo ôh klei pui ƀơ̆ng dliê, ƀiădah amâo mâo djŏ ôh snăn, ngă hĕ klei amâo mâo răng, kyudah hŏng adiê không mđiă msĕ si ară anei, jing dleh dưi thâo tĭng mkă. Klei anei anôk bruă srăng jao bruă gang răng huĭ kơ klei pui ƀơ̆ng dliê hlăm yan bhang, čang hmăng hlăm thŭn anei srăng mâo klei tŭ dưn msĕ si thŭn dih mơh”./.

Pô mblang: Y-Khem Niê