Hlue si hdră kčah mơ̆ng Gưl dlông, ti anăp, dŭm čar Lâm Đồng, Bình Thuận leh anăn Dak Nông srăng bi mŭt jing čar Lâm Đồng mrâo, anôk bruă ngă hră mơar čar mrâo dưm ti ƀuôn prŏng Đà Lạt, čar Lâm Đồng. Mĭn tĭng srăng mâo giăm 2000 čô knuă druh, phung mă bruă knŭk kna leh anăn phung mă bruă mơ̆ng čar Dak Nông nao mă bruă ti ƀuôn prŏng Đà Lạt.

Mơ̆ng klei ksiêm dlăng hlăm brô 20% hlăm ênoh anei mâo klei čiăng mă bruă hlue si krĭng wăl tơdah mâo klei dưi brei. Djŏ tuôm kơ bruă mkŏ dăp êpul bruă čar Lâm Đồng leh bi mŭt, mĭn tĭng srăng jum giăm 7.750 čô mă bruă hlăm êpul bruă knŭk kna mơ̆ng dŭm čar êlâo kơ bi mŭt. Ară anei, Êpul gơ̆ng bi mŭt čar mrâo mkŏ mjing leh hdră msir đru kơ kdrăp mnơ̆ng găn êrô, anôk dôk… kñămm đru kơ êpul mă bruă hơĭt klei hdĭp mda, srăng ngă bruă klam ti anôk mă bruă mrâo.