VOV4.Êđê - Hruê mbruê 26/9, blŭ hlăm klei kƀĭn online kluôm ala kơ bruă mtrŭt mđĭ klei brei čan duh bi liê bruă knŭk kna leh anăn hluê ngă 3 hdră ala čar kñăm, Khua knŭk kna Phạm Minh Chính lač klă, srăng gĭr jih ai leh anăn hluê ngă ktang hĭn dŭm hdră êlan gĭr bi leh jih hnơ̆ng bruă klam brei čan duh bi liê bruă knŭk kna thŭn 2022. Hlăm wưng kơ anăp, Khua knŭk kna mtă kơ dŭm phŭn, dhar bruă, alŭ wăl lŏ dơ̆ng ba jao ngăn prăk 75.000 êklai prăk kơ dŭm hdră mâo ênŭm klei găl. Dŭm êpul ngă bruă lŏ hluê ngă jăk bruă klam, ksiêm dlăng, mtrŭt mjhar, mđĭ ai dŭm anôk bruă, ruh mgaih klei dleh dlan, mâo klei bi mguôp kjăp hĭn, ñĕ đuê̆ kơ klei ngă hră mơar mdêč mdar. Khua knŭk kna mtă, dŭm alŭ wăl srăng thâo klă boh sĭt, bi mklin, hưn mdah dŭm klei dleh dlan, kpăk êgun hlăm boh sĭt, bi êdah dŭm hdră êlan, hluê anăn dŭm phŭn, dhar bruă mjêč mgaih msir mtam.

            Y-Ƀel pô mblang