Hlăm hdră, hlăm ai êwa mjĕ giăm, hơuh mđao, phung bi ala dưi mjĕ mjuk leh anăn mđing hmư̆ dŭm klei kah mbha, klei hmăng hmưi, klei čiăng mơ̆ng phung hriăm gưl prŏng leh anăn phung êdam êra mnuih djuê ƀiă, phung đăo êdah êdi. Anei jinh phung hur har, mâo lu boh tŭ dưn hlăm klei hriăm hră mơar, mjuăt pô ăt msĕ mơh čô̆ kơ bruă. Diñu bi ala kơ phung êdam êra alŭ wăl hưn mdah dŭm boh klei hlăm hdră êlan đru kơ phung hriăm gưl prŏng, êdam êra mnuih djuê ƀiă, hmăng hmưi phung hriăm gưl prŏng, phung êdam êra dưi lĭng čan prăk mnga hdjul, mkŏ bruă mă.

Hlăm hdră, khua gĭt gai đa đa anôk bruă ăt bi trông, hưn mdah klă klơ̆ng hĭn kơ dŭm hdră đru kơ phung hriăm gưl prŏng leh anăn phung êdam êra mnuih djuê ƀiă, boh nik hlăm bruă mtô mjuăt, bruă mă leh anăn nao mă bruă ti ala tač êngao. Nao hlăm hdră, adei Saronny Arul, sa čô hriăm gưl prŏng bruă klei mjĕ giăm tar rŏng lăn, Anôk bruă bi hriăm bruă hŏng tač êngao brei thâo:

Dŭm hdră msĕ sơnei srăng mkŏ mjing boh kdrŭt kơ kâo dưi hriăm jăk hĭn. Kyua phung khua gĭt gai kah mbha klă nik jing phung hmei srăng hriăm jăk leh anăn wĭt tinei, jing mta phŭn, sa asăr mjeh jăk kơ ƀuôn prŏng leh anăn čar pô. Kyuandah tinei mâo lu mnuih dôk guôn phung msĕ hmei. Hmăng hmưi êdei anăp srăng mâo thiăm dŭm mmông bi tuôm čiăng dưi mđĭ ai phung hđeh sang hră, phung hriăm gưl prŏng dôk hriăm kbưi hŏng gŏ sang.

Wưng anei, bruă sang čư êa ƀuôn prŏng Ƀuôn Ama Thuôt mđup brei hră pah mni kơ 8 čô hriăm gưl proĭng êdeh êdi, Bruă đoàn ƀuôn prŏng pah mni 11 čô hriăm gưl prŏng leh anăn 31 čô êdam êra mnuih djuê ƀiă, phung đăo êdah êdi. Bi ala khua gĭt gai alŭ wăl, Trần Đức Nhật, k’iăng khua bruă sang čư êa ƀuôn prŏng Ƀuôn Ama Thuôt hmăng hmưi grăp čô hriăm gưl prŏng, êdam êra mnuih djuê ƀiă srăng jing sa čô bi lar knhuah dhar kreh djuê ana, rup anak mnuih leh anăn krĭng lăn Ƀuôn Ama Thuôt, čar Dak Lak.

           “Hmăng hmưi phung mâo klei pah mni hlăm hdră hruê anei srăng jing mta phŭn đru mguôp klu hĭn kơ ƀuôn sang Ƀuôn Ama Thuôt leh anăn čar Dak Lak hlăm wưng kơ anăp. Hmăng hmưi diñu jing phung bi ala, mta phŭn, jing mâo ba knhuah dhar kreh, knhuah gru Ƀuôn Ama Thuôt truh hŏng phung mah jiăng hlăm leh anăn êngao lăn čar. Diñu srăng jing phung bi ala čiăng đru mkŏ mjing, hưn mdah rup ƀuôn prŏng Ƀuôn Ama Thuôt – ƀuôn prŏng kphê mơ̆ng tar rŏng lăn, hrăm mbĭt mkŏ mjing ƀuôn prŏng mtah, wăl hdĭp, thâo mĭn leh anăn knhuah gru”.

Bi lar knhuah gru bi mguôp, khăp kơ lăn čar mơ̆ng djuê ana Việt Nam, hlăm wưng kơ anăp, phung êdam êra mnuih djuê ƀiă leh anăn klei đăo ƀuôn prŏng Ƀuôn Ama Thuôt, čar Dak Lak amâo mâo mdei gĭr ktưn, mjuăt hriăm leh anăn hur har duh myơr hlăm bruă mkŏ mjing leh anăn răng mgang lăn čar. Ƀrư̆ hruê ƀrư̆ mâo lu phung êdam êra mnuih djuê ƀiă hluê hriăm hlăm dŭm sang hră gưl prŏng, gưl krah hlăm kluôm lăn čar, leh hriăm jih, lu phung hrăm gưl prŏng dưi dăp anôk mă bruă leh anăn păn ngă bruă klam kmeh gơ̆ng hlăm bruă Đảng, knŭk kna leh anăn dŭm êpul, dhar bruă dŭm gưl.

Lu hlăm diñu jing phung kreh kriăn hriăm hră mơar, kriăng mjuăt pô, gĭt ktưn hlăm klei hdĭp. Klei anăn dưi bi klă, ƀrư̆ hruê ƀrư̆ mâo lu phung êdam êra mnuih djuê ƀiă hluê hriăm ti dŭm sang hră gưl prŏng, gưl krah hlăm kluôm ala leh hriăm jih, lu phung hrăm gưl prŏng dưi dăp anôk mă bruă leh anăn păn ngă bruă klam kmeh gơ̆ng hlăm bruă Đảng, knŭk kna leh anăn dŭm êpul, dhar bruă dŭm gưl, dŭm êbâo čô êdam êra hur har hlăm klei hriăm hră, mă bruă knuă, mnia mblei bi mdrŏng kơ pô, gŏ sang leh anăn yang ƀuôn, đru lăm lui klei ư̆ êpa, mđĭ hnơ̆ng klei hdĭp mnuih ƀuôn sang.