Hdơr klei mtă mơ̆ng Awa Hồ “ti anôk čiăng êdam êra mâo, ya bruă dleh mâo êdam êra”, đảng viên Trần Tiến (1992), pô mă bruă adŭ bruă kriê dlăng klei hrui prăk – hră mơar, hră ênua yang ƀuôn čar Dak Lak đru kčĕ mkŏ mjing hdră bruă êdam êra mding truh kơ dŭm alŭ wăl hlăm čar. Ñu lu blư̆ mkŏ hlăm bruă mkŏ mjing, đru mguôp răng mgang klei êđăp ênang, bi lar dŭm boh tŭ dưn dhar kreh mơ̆ng djuê ƀiă, msĕ si mkra mđĭ, bi doh pin êa, mđĭ klei thâo răng mgang wăl hdĭp mda kơ mnuih ƀuôn sang, mđup brei hnư mnơ̆ng, đru brei ngăn prăk mtô tông čing  kơ krĭng knông lăn. Mbĭt hŏng anăn, ñu čŏng ksiêm hriăm, mtrŭt mđĭ klei mlih mrô hlăm bruă knuă, mâo lu klei bi hmô mrâo, hdră ngă bruă mbruă čiăng đru kơ mnuih ƀuôn sang dưn yua dŭm kdrăp online. Đảng viên Trần Tiến brei thâo:

 “Kâo jing đảng viên mda asei, ăt mâo anôk bruă mkŏ mjing klei găl klam ngă klei bi kƀĭn, mâo klei găl ksiêm duah êlam kơ đa đa klei čih klă klơ̆ng mơ̆ng bruă hluê ngă gru mngač Awa. Kâo gĭr jih ai tiê kyua bruă mbĭt, hlăm djăp bruă klam kâo hriăm kơ Awa lu hĭn hlăm klei čŏng hriăm, amâo mâo mdei klei hriăm čiăng mđĭ klei thâo pô”.

         Hŏng amai Nguyễn Thùy Trang, k’kiêng thŭn 1992, Khua bruă êdam êra ƀuôn hgŭm Ea Tam, ƀuôn prŏng Ƀuôn Ama Thuôt, wăt hlăm grăp ênuk thŭn, kjăp bruă păn, ñu thâo klă bruă klam mơ̆ng sa čô knuă druh. 23 thŭn ƀiădah ñu jing k’iăng khua dhar bruă mặt trận ƀuôn hgŭm mda hĭn ti Dak Lak. Mơ̆ng hruê nă bruă đoàn, ñu mtrŭt mjhar mkŏ mjing 7 hdră bruă êdam êra, mkŏ mjing lu hdră bruă bi hơĭt yang ƀuôn, hur har nao hgŭm mtrŭt mjhar phung êdam êra nao kahan, đru kơ êdam êra čô̆ bruă, bi mguôp phung êdam êra dŭm hdră kriê pioh leh anăn bi lar knhuah gru dhar kreh dŭm djuê ana. Hlue anăn, mkŏ mjing klei bi mguôp, bi lar bruă klam êdam êra ti nah tŭ. Amai Nguyễn Thùy Trang brei thâo:

      “Hŏng dŭm klei mtrŭt mjhar ăt msei mơh ksiêm duah kơ Awa kâo pô hriăm mơ̆ng awa klei kreh kriăng, mtrŭn pô leh anăn bi myuôm bruă klam pô hlăm bruă klam dưi jao mơ̆ng dŭm gưl. Kpă ênô, čiăng ngă djŏ leh anăn djŏ hdră bhiăn mơ̆ng êpul bruă čiăng mkŏ mjing klei mjĕ giăm plah wah Đảng hŏng mnuih ƀuôn sang leh anăn knuă druh hŏng phung êdam êra”.

Čih yap klei găl, đru mguôp mơ̆ng phung êdam êra mda asei mrâo êgao, bruă Êdam êra čar Dak Lak mrâo pah mni 33 čô đảng viên mda asei êdah êdi mơ̆ng dŭm kdriêk, wăl krah, ƀuôn prŏng leh anăn dŭm anôk bruă hlăm čar. Anei jing phung êdah êdi hlăm, lu mta bruă msĕ si – ksiêm duah klei kreh knhâo, mđĭ kyar bruă duh mkra – čô̆ kơ bruă, bruă êpul, bruă lĭng kahan răng mgang klei êđăp ênang, mkŏ mkra krĭng ƀuôn sang mrâo leh anăn răng mgang wăl hdĭp mda. Dưi pah mni hlăm wưng anei, amai Phạm Thị Thu Thảo, khua bruă đoàn sang hră gưl 3 Ƀuôn Hồ, wăl krah Ƀuôn Hồ, čar Dak Lak brei thâo:

 “Kâo ƀuh hơ̆k mơak leh anăn ktưn hưn, hlăm wưng kpưn đĭ anei hŏng kâo pô jing đảng viên mda asei, sa čô djă bruă đoàn ƀuh bruă klam pô srăng jing pô đru bruă čiăng mbĭt hŏng lăn čar ƀrư̆ hruê ƀrư̆ đĭ kyar hĭn”.

“Ti anôk čiăng êdam êra mâo, ya bruă dleh mâo êdam êra” – klei mtô mơ̆ng Awa Hồ mơ̆ng đưm jing leh mnơ̆ng ktrâo êlan kơ lu đảng viên mda asei ngă klei duh myơr. Ti Dak Lak, phung đảng viên msĕ si Trần Tiến, Nguyễn Thùy Trang leh anăn Phạm Thị Thu Thảo dưi leh anăn dôk bi klă bruă klam nao êlâo hlăm djăp mta bruă, mơ̆ng bruă thơ̆ng truh kơ bruă êdam êran, mơ̆ng kriê pioh knuah gru dhar kreh truh kơ klei mlih mrô đru kơ mnuih ƀuôn sang. Diñu amâo djŏ knŏng hriăm mơ̆ng Awa hlăm ai tiê bruă klam, čŏng pô hriăm, mjing dŭm boh tŭ dưn anăn jing bruă klă klơ̆ng, bi lar klei hdĭp jăk – hdĭp tŭ dưn hlăm yang ƀuôn.

Bruă bi mni kơ phung đảng viên mda asei jing wưng kơ Bruă êdam êra čar Dak Lak lŏ dơ̆ng bi lar klei duh myơr, klei mĭn kpưn đĭ hlăm phung êdam êra, đru mkŏ mjing êpul bruă đoàn kjăp ktang, bi lar bruă klam mơ̆ng phung mda asei hlăm bruă mkŏ mjing mjing leh anăn răng mgang lăn čar. Mkŏ mjing čar Dak Lak ƀrư̆ hruê ƀrư̆ đĭ kyar, mrâo mrang.