Hŏng akŏ “Mđĭ lar knhuah gru êbâo thŭn kreh dhar lehanăn jhŏng ktang; hgŭm mguôp mkŏ mkra bruă Đảng dọ mngač, kjăp ktang; ba anăp; jing gru mngač hlăm ênuk gưl mrâo; mđĭ kyar Buôn prŏng kreh dhar, mrâo mrang, yâo mơak”, aguah hruê 16-10 mkŏ mjing leh Klei bi kƀĭn bruă Đảng ƀuôn prŏng Hà Nội gưl XVIII, wưng thŭn 2025-2030 hŏng klei nao hgŭm mơ̆ng 550 čô bi ala.

Hluê si klei hưn bruă kđi čả ti anôk bi kƀĭn, wưng êgao, dŭm hnơ̆ng čuăn dưi mâo lehanăn êgao, hdră duh mkra Ƀuôn prŏng phŭn amâo mdei mđĭ kyar hŏng hnơ̆ng đĭ hĭn mkă hŏng hnơ̆ng kah knar kluôm ala. Blŭ hrăm ti anôk bi kbĭn, Khua gĭt gai Đảng Tô Lâm mñă: Ala čar drei, ƀuôn prŏng drei dôk mŭt hlăm wưng đĭ kyar mrâo mơ̆ng djuê ana hŏng dŭm klei găl, lông dlăng. Khua gĭt gai mtă kơ 7 bruă klam čiăng kơ bruă Đảng ƀuôn prŏng Hà Nội mđing gĭt gai hlăm wưng ti anăp. Khua gĭt gai Đảng Tô Lâm mtă, Hà Nội brei mkŏ mjing msĕ si sa “Ƀuôn prŏng kreh dhar – jiă knhuah dhar kreh – mrâo mrang”, mđing truh kơ sa “ Ƀuôn prŏng phŭn kreh dhar – mrâo mrang – hơĭt kjăp” hŏng klei thâo, kơhưm tar rŏng lăn. Hluê anăn, mkŏ mjing “3 krĭng mrâo”, ba yua tič hnơ̆ng boh tŭ yuôm hƀuê ênuk, klei thâo lehanăn kdrăp mrâo, ba Hà Nội jing ƀuôn prŏng bi mklin klei jăk siam mơ̆ng ênuk đưm, ară anei lehanăn êdei anăp.”