VOV4.Êđê- Blŭ hrăm hlăm klei bi kƀĭn jao bruă kơ hdră gang mkhư̆ covid-19 ti alŭ wăl hlăm tlam mmăt hruê 17/2, Chử Xuân Dũng, K’iăng Khua knơ̆ng bruă sang čư̆ êa ƀuôn prŏng Hà Nội brei thâo, Anôk dlăng bruă Đảng ƀuôn prŏng bi tŭ ư hdră kơ phung hđeh sang hră gưl điêt lŏ wĭt hriăm ti sang hră mơ̆ng hruê 1/3, jao kơ Knơ̆ng bruă sang hră mtô bi hriăm ksiêm hriăm, mkŏ mjing hdră, kčĕ kơ boh phŭn anei, hlăm anăn mtă dŭm hdră msir mkŏ mjing rơ̆ng êđăp ênang, mbruă, tŭ dưn ƀiădah amâo ngă mtŭk mtŭl čiăng ngă djŏ klei mnuih ƀuôn sang čang hmăng. Chử Xuân Dũng mtă kơ dŭm gưl, dhar bruă, alŭ wăl ngă bruă jih ai tiê, dlăng anei jing bruă klam yuôm bhăn, pral bi hgŭm hŏng sang hră pŏk ngă bi jăk bruă gang mkhư̆ klei ruă tưo, rơ̆ng mkŏ mjing klei mtô bi hriăm êđăp ênang, pŏk ngă mđrăm mbĭt bruă ba hđeh sang hră lŏ wĭt hriăm, mâo mnuih ƀuôn sang, hđeh sang hră tŭ ư hŏng ai tiê hơ̆k mơak.

Pô mblang: H’Zawut Ƀuôn Yă