VOV4.Êđê - Čiăng thâo pral mdrơ̆ng hŏng klei ruă tưp, hlăm gưl Tết Nguyên đán Nhâm Dần, ƀuôn prŏng Hà Nội mtă kơ dŭm alŭ wăl, kƀĭn, pral hlăm djăp klei mâo, boh nik hlăm boh klei ti alŭ wăl mâo mta mrâo Omicron. Hlăm dŭm hruê êgao, kah knar grăp hruê ƀuôn prŏng mâo hlăm brô 2.900 čô mnuih ruă. Ênoh mnuih ruă klă klơ̆ng dưi ktuê dlăng jăk, ƀiădah klei đaŏ knăl hruê kăn kơ anăp năng ai mâo hnơ̆ng hrŏ mgưt kyua mnuih ƀuôn sang wĭt ƀuôn sang drông Tết leh anăn srăng lŏ đĭ êdei kơ Tết. Ară anei, ƀuôn prŏng dôk ti hnơ̆ng gưl 2 hlăm hdră gang mkhư̆ klei ruă tưp. Ƀuôn prŏng čih yap 14 čô mnuih djŏ mta mrâo Omicron. Mta mrâo mâo leh ti Hà Nội, huĭ tưp lar hlăm êpul êya jing klei srăng mâo. Kyua anăn, brei ktuê dlăng jăk leh anăn ba yua dŭm hdră ktuê dlăng klei ruă tưp kjăp hŏng dŭm phŭn mtưp mta mrâo anei. Knơ̆ng bruă mdrao mgŭn Hà Nội mtă kơ dŭm sang êa drao mkŏ mjing jăk bruă dŏng mdrao, ksiêm mkă kơ mnuih ƀuôn sang, rơ̆ng kơ mnuih ruă dưi hmao dŏng mdrao.

H’Zawut pô mblang