VOV4.Êđê - Leh sa hruê kăm wĭt ngă klei mtô mjuăt bi hriăm klă anăp, hđeh điêt, hđeh sang hră gưl 1 leh anăn hđeh sang hră adŭ 6 ti ƀuôn prŏng Ƀuôn Ama Thuôt, čar Dak Lak lŏ dơ̆ng wĭt hlăm klei hriăm êlan online mơ̆ng hruê 21/02/2022 truh kơ êla lŏ mâo klei hâo hưn mrâo. Boh phŭn mâo bruă sang čư êa ƀuôn prŏng Ƀuôn Ama Thuôt, čar Dak Lak ba mdah klei bi klă anei jing kyua klei ruă tưp Covid-19 dôk dleh dưi ksiêm dlăng hlăm alŭ wăl.

Truh kơ ară anei mâo leh êbeh 40 čô nai leh anăn êbeh 420 čô hđeh sang hră mâo klei ruă tưp Covid-19. Bi kơ phung hđeh ti gŭ 11 thŭn, ka mâo ôh klei tlŏ mgang, čiăng rơ̆ng klei suaih pral kơ phung hđeh leh anăn phung nai, bruă sang čư êa ƀuôn prŏng Ƀuôn Ama Thuôt, čar Dak Lak gĭt gai brei mdei êjai klei hriăm klă anăp mơ̆ng hruê 21/02/2022 truh kơ êla lŏ mâo klei hâo hưn mrâo. Jao kơ adŭ bruă mtô mjuăt bi hriăm mkŏ mjing hdră hrăm online hŏng dŭm gưl hriăm anei.

Y-Ƀel pô mblang