VOV4.Êđê - Jing klei mưng ngă, leh gưl mdei Tết nguyên đán, phung êdam êra kluôm ala lŏ hur har nao ngă kahan ngă bruă klam yuôm bhăn hŏng čar kwar. Ti čar Dak Lak, giăm 3000 čô êdam êra mprăp nao ngă kahan hlăm gưl yan mnga mrâo Nhâm Dần - thŭn 2022 anei mtam.

Hlăm gưl ruah mă lĭng kahan tal anei, êkei êdam Nguyễn Trung Sơn, 24 thŭn, ti wăl krah Quảng Phú, kdriêk Čư̆ Mgar, čar Dak Lak čŏng pô ngă hră akâo nao kahan. Nguyễn Trung Sơn brei thâo: Ñu dôk mă bruă jing  mgăt êdeh hlăm sa anôk bruă mkra mjing hŏng ênoh prăk mlan hơĭt jing 7 êklăk prăk hlăm sa mlan. Ƀiădah hŏng klei hmăng hmưi čiăng nao kahan leh anăn bruă klam pô hŏng ƀuôn sang, ala čar, ñu lui hĕ êjai bruă duh mkra pô čiăng bi leh bruă klam jing lĭng kahan.“Kâo mơak sơnăk kyua dưi djŏ nao kahan. Kâo srăng bi leh jăk bruă klam hlăk thŭn mda. Kâo thâo êjai dôk nao kahan jing mâo lu klei hriăm leh anăn mâo klei bhiăn ktang êdi, ƀiădah kâo srăng gĭr ktưn bi leh bruă pô, djŏ hŏng klei hmăng hmưi mơ̆ng jih jang brei kơ hmei.

Êjai ngă hră akâo nao kahan, êkei êdam Trương Thái Hoàng (25 thŭn) dôk ngă knuă druh bruă đoàn ti ƀuôn hgŭm Ea Tam, ƀuôn prŏng Ƀuôn Ama Thuôt. Trương Thái Hoàng hriăm jih leh klei hriăm thơ̆ng kơ bruă duh mkra – sang hră gưl prŏng krĭng Lăn Dăp Kngư, leh anăn jing sa čô Đảng Viên mda asei. Ñu čŏng pô akâo nao kahan răng mgang ala čar, hluê si gru mngač mơ̆ng sa čô ama – sa čô lĭng kahan leh jih thŭn mă bruă.“Hŏng bruă klam jing sa čô mda asei leh jih klei hriăm gưl prŏng, kyuanăn srăng mâo klei hmăng hmưi leh anăn bruă klam hŏng ala čar, srăng ba anăp hlăm bruă nao kahan. Hlăm hruê mmông nao kahan srăng hluê ngă djŏ dŭm hdră bhiăn, klei hdĭp hlăm lĭng kahan čiăng bi leh bruă klam arăng jao leh, bi leh bruă klam hnưm čiăng wĭt kơ yang ƀuôn jing sa čô mnuih jăk hĭn.”

Thŭn 2022, čar Dak Lak dưi jao ruah mă 2.977 čô mnuih hluê ngă klei bhiăn nao kahan. Dŭm alŭ wăl hlăm čar ngă jăk leh bruă ruah mă, hđeh êdam êra nao kahan mâo 100% hnơ̆ng čoh čuăn. Dŭm čô hđeh êdam êra mâo djăp ênŭm hnơ̆ng čoh čuăn kơ bruă kđi čar, ênuk thŭn, klei suaih pral, klei hriăm hră mơar. Hlăm anăn mâo 60 čô phung leh jih hriăm gưl prŏng, gưl krah dưh, 4 čô jing đảng viên, dŭm čô adôk jing đoàn viên, hđeh êdam êra mnuih djuê ƀiă mâo êbeh 50%, Đại tá Lê Văn Hùng, k’iăng khua knơ̆ng gĭt gai lĭng kahan hlŏng ngă khua êpul đru kčĕ bruă mơ̆ng knơ̆ng gĭt gai lĭng kahan čar Dak Lak brei thâo:“Êpul gơ̆ng bruă lĭng kahan čar mâo leh klei gĭt gai kơ dŭm alŭ wăl bi lar dŭm êpul êya bruă kđi čar yang ƀuôn, gưl bruă Đảng nah gŭ hlăm bruă sang čư êa alŭ wăl, dŭm gưl êpul êya ngă bruă hâo hưn, mtô bi hriăm klei bhiăn nao kahan leh anăn dŭm hră mơar mtô bi hriăm mơ̆ng phŭn bruă lĭng kahan, wăl kahan, êpul gơ̆ng bruă lĭng kahan gưl čar truh kơ jih jang mnuih ƀuôn sang hlăm ênuk thŭn nao kahan. Mbĭt anăn hmei lŏ ngă bruă bi êdah klă mngač hŏng dŭm čô dôk hlăm êpul amâo dưi nao kahan, bi kdung bruă klam nao kahan. Mơ̆ng anăn mnuih hlăk ênuk thŭn nao kahan nao ngă bruă mkă dlăng, mprăp kơ klei nao kahan”.

Truh kơ ară anei, jih jang phung hđeh êdam êra nao kahan ti čar Dak Lak tlŏ mgang ênŭm leh 2 aruăt vaccine gang mkhư̆ klei ruă tưp Covid-19, đa đa mâo leh aruăt tal 3. Hluê si hdră čoh čuăn, ti aguah hruê 16/2, dŭm alŭ wăl hlăm čar Dak Lak srăng hrăm mbĭt nao atăt hđeh êram êra nao kahan, rơ̆ng kjăp klei êđăp ênang leh anăn klă klơ̆ng jing hruê knăm mơak mơ̆ng hđeh êdam êra ti čar Dak Lak.