Ti krĭng knông lăn să Đăk Nhoong, kdriêk Đăk Glei, čar Kon Tum, A Cu, djuê ana Jehtriêng, Khua bruă Đảng, hlŏng ngă khua alŭ Đăk Ga, yăl dliê, mnuih ƀuôn sang hlăm ƀuôn mâo nanao klei thâo bi đru hdơ̆ng găp, hlăm klei duh ƀơ̆ng, lehanăn bi mguôp jih ai tiê hŏng êpul răng mgang klei êđăp ênang knông lăn. Klei hriăm lehanăn hlue ngă knhuah mngač A wa Hô, jing jĕ giăm klă klơ̆ng hŏng phung đảng viên tinei:

“Grăp hrue kâo hriăm lehanăn hlue ngă tui si knhuah mngač mơ̆ng A wa, tui hriăm klei jăk, klei djŏ. Hriăm mơ̆ng A wa jing klei mkiêt mkriêm yua hlăm grăp hrue. Hriăm hlăm klei dôk dơ̆ng ƀơ̆ng huă, mtrŭt mnuih ƀuôn sang gĭr duh ƀơ̆ng kpưn đĭ tlaih mơ̆ng ƀun hŏng klei kjăp”.

Đảng viên ba êlan êlâo, lehanăn ngă hŏng klei jăk mơh, čiăng kơ mnuih ƀuôn sang tui hlue, anăn jing klei A Thiếu, djuê ana Jarai, ti ƀuôn Lung, să Ya Xiêr, kdriêk Sa Thầy, čar Kon Tum, bi mlih đang hma pla mtŭk mtŭl, pioh mđĭ kyar klei hdĭp.

“Tơdah drei pla mnơ̆ng ƀiădah phưi tha snei, sĭt nik mnơ̆ng drei pla amâo mâo đĭ jing ôh, mâo mnuih bi lač, knŭk kna mkăp brei mjeh amâo mâo jăk ôh, snăn jing kăn djŏ, anăn knŏng jing knil kơ pô duah mplĕ klei soh, boh sĭt pô amâo mâo thâo mă bruă. Tơdah thâo dlăng kriê wiê ênăk bi jăk, sĭt nik mnơ̆ng pô pla ăt dĭ jing. Gŏ sang kâo klei leh ƀăng pla mnơ̆ng, duh bi liê blei masin pom êa, lehanăn ktarr kbang êa, mkŏ kdrăp krih êa.

Gŏ sang kâo gĭr ktir dlăng kriê mnơ̆ng pla bi jăk kñăm mâo ênoh ba wĭt hơĭt, lehanăn čiăng kơ jih jang mnuih ƀuôn sang tui ngă msĕ, tlaih mơ̆ng ƀun hŏng klei kjăp'’

  3 thŭn êgao, krĭng mnuih djuê ƀiă čar Kon Tum mâo mkŏ mjing leh êbeh 800 klei bi hmô kơ bruă bi đru hlăm bruă duh ƀơ̆ng, mđĭ mlih đang hma mtŭk mtŭl, lăm lui hĕ klei bhiăn hđăp amâo lŏ djŏ... Jih jang klei bi hmô anăn đru leh kơ êbeh 10.000 gưl gŏ sang ƀun, lehanăn giăm ƀun mâo leh klei găl kpưn đĭ. Jing leh sa hlăm dŭm klei bi hmô mâo mă klei pah mni ti anôk bi kƀĭn mơ̆ng bruă tui hriăm lehanăn hlue ngă knhuah mngač Hồ Chí Minh mơ̆ng bruă Đảng čar Kon Tum mkŏ mjing hlăk mlan 5 leh êgao, A Huế, dân tộc Xơ-Đăng, jing khua ƀuôn Kon Nhên, să Đăk Ruồng, kdriêk Kon Braih, lač:

“Hriăm lehanăn tui ngă hlue knhuah mngač khua gĭt gai Hồ Chí Minh, hmei mtrŭt leh mnuih ƀuôn sang nao hlăm bruă mkŏ mkra krĭng ƀuôn sang mrâo. Kâo lŏ mtrŭt mnuih ƀuôn sang thâo bi đru hrue ai mă bruă, bi mdoh wăl sang roong, bi mdoh êlan klông hlăm ƀuôn sang. Pla kyâo ktue dua nah êlan. Lŏ wĭt dlăng klei hdĭp mnuih ƀuôn sang ară anei amâo mâo lŏ dôk hlăm klei êmưt msĕ si mphŭn dô ôh”.

          Ăt mmsĕ hŏng čar Kon Tum mơh, mnuih ƀuôn sang djăp djuê ana ti čar   Lâm Đồng hlăl bi mlih mnơ̆ng pla, ba yua klei kreh knhâo hlăm klei duh ƀơ̆ng, ƀrư̆ hrue ƀrư̆ mâo klei čăt đĭ hĭn leh. Kon Sơ Ha Vương, djuê ana K’Ho, jing khua bruă mặt trận să Dă Đạ Nhim, kdriêk Lạc Dương, brei thâo, hrô kơ klei pla knŏng kphê, mnuih ƀuôn sang lŏ pla lu mta, ƀrư̆ ƀrư̆ pla dŭm mta mnơ̆ng tui si mnuih blei yua ciăng, lehanăn sa ai tiê mkŏ mjing să krĭng ƀuôn sang mrâo mđĭ hnơ̆ng tŭ:

“Hŏng hdră êlan knŭk kna lehanăn mnuih ƀuôn sang mă bruă mbĭt, lu bruă mkra êlan klông, kban kdrông, mâo duh bi liê leh hŏng klei kjăp. Mbĭt hŏng klei duh mkra hơĭt kjăp lehanăn mnuih ƀuôn sang mâo ai tiê bi đru mâo mđĭ leh lu klei tŭ dưn”.

Nao hlăm hdră pla mjing lu mta mnơ̆ng, anăp truh pla mjing mnơ̆ng pioh truăn kơ klei čhĭ mnia, anak Êđê ti čar daklak hlăk hlê dơ̆ng đĭ nao kơ mdrŏng. Y-Mi Êban, ti buôn Ea K’mat, să Hoà Đông, kdriêk Krông Pač yal dliê kơ bruă ñu pla boh durian, pla tiu, hlăm hma kphê mâo 1,4 ha.

“Pô jing sa čô đảng viên snăn bi ba akŏ yơh, ngă klei thâo bi hmô êlâo, čiăng kơ mnuih ƀuốn ang tui hlue, jih ai tiê bi hriăm êmuh, pioh mđĭ kyar klei hdĭp mda. Êjai leh pla pluă boh durian, ăt mâo prăk lu ôh duh kơ bruă, snăn nao čan prăk ti knơ̆ng prăk, lehanăn tui hriăm hdră pla mjing, snăn thhŭn anei mâo pĕ hlăm 15 tôn boh durian, lŏ mâo mbĭt hŏng kphê tiu snăn hơưĭt leh mơh klei hdĭp mda”.

Ti čar Gia Lai, mnuih ƀuôn sang djăp djuê ana ăt dôk bi hriăm êmuh hdră duh ƀơ̆ng mrâo, čiăng mâo klei hdĭp trei mđao. Khua mduôn Hmrick, djuê ana Jarai, ti ƀuôn Ia Nueng, să Biển Hồ, ƀuôn prŏng Pleiku, brei thâo, hŏng klei knŭk kna duh bi liê, mnuih ƀuôn sang lŏ kơrŭ wĭt leh bruă krah mjing rup hŏng kyâo, bruă krĭ mñam, bruă đêč giêng, hriăm bruă tŭk knă mnơ̆ng ƀơ̆ng djuê ana pô hlăm klei doh, lehanăn mkŏ mjing bruă hiu čhưn ênguê hlăm yang ƀuôn:

“Ară anei klei hdĭp mda mnuih ƀuôn sang mâo leh klei bi mlih, hlăm ƀuôn sang mâo leh êlan klông jăk găl kơ klei găn êrô, amâo lŏ mâo ôh gŏ êsei dôk hlăm klei ư̆ êpa. Hŏng klei jing khua mduôn, snăn kâo mâo nanao klei mtă mtăn kơ mnuih ƀuôn sang thâo săng kơ hdră êlan mơ̆ng Đảng, Knŭk kna čiăng kơ mnuih ƀuôn sang tui hlue djŏ bruă mơ̆ng Đảng, Knŭk kna. Mkŏ mjing ƀuôn dharr kreh hiu čhưn ênguê jing leh hdră êlan djŏ, pioh bi mlih klei hdĭp mnuih ƀuôn sang, srăng mâo klei trei mđao, jăk mơak hĭn”.

Mbĭt hŏng mnuih ƀuôn sang djăp djuê ana ti lăn Dap kngư, mnuih Mnông ti čar Daknông hlăk bi ktuh êyuhmđĭ kyar klei hdĭp mda, mkŏ mkra krĭng ƀuôn sang mrâo. K’Sung, Khua bon Ting Wel Đơm, să Dak Nia, ƀuôn prŏng Gia Nghĩa, hŏng klei mơak lač: Kyua mâo Đảng, mâo Awa Hồ, mnuih ƀuôn sang hlăm ƀuôn mâo klei bi mlih, trei mđao:

“Hlăm ênuk bi blah, mnuih ƀuôn sang djuê ƀiă mâo nanao klei jưh knang kơ Đảng. Tơl truh kơ ară anei, mnuih ƀuôn sang ăt đăo knang kơ dŭm hdră êlan mâo Đảng, klei bhiăn knŭk kna tă brei leh, mâo nanao ai tiê thâo bi mguôp, čiăng duh ƀơ̆ng mđĭ kyar klei hdĭp mda đĭ nao kơ mdrŏng sah, đru kơ lăn čar ktang kjăp”.

Khua gĭt gai Hồ Chí Minh wĭt leh kơ aê aduôn atâo atiêt 55 thŭn êgao leh, ƀiădah klei khăo mơ̆ng ñu hŏng mnuih ƀuôn sang Việt nam dôk nanao. Jih jang kluôm Đảng, jih jang mnuih ƀuôn sang čŏng ƀuăn “hlăm klei thâo bi mguôp, rŭ mdơ̆ng lăn čar Việt Nam êđăp ênang, hluh lir, hnŭk êngiê, lehanăn mdrŏng sah, djŏ hŏng klei khua gĭt gai Hồ Chí Minh hmăng hmưi./.