Êjai yang hruê mrâo đĭ tŭ drông hruê mrâo, mđiă mngač mơ̆ng adiê mtah leh anăn ti êlah êa ksĭ mtah, hngeh phung, dlăng ƀuh wăt san hô ti gŭ êa, phung lĭng kahan pral bi doh asei mlei pô leh anăn mă êa anăn čiăng krih kơ ana kyâo, krih kơ djam mtam. Dŭm thŭn giăm anei, plao ksĭ dưi duh bi liê brŏng êa, kyuanăn dưi čŏng pô rơ̆ng bi mâo djăp 100% klei čiăng kơ êa yua aguah tlam. Trung sĩ Thái Phương Nam dôk mă bruă ti plao ksĭ Đá Thị brei thâo:

Đru mguôp ai tiê hlăm đang djam, đang kyâo leh anăn dưi ƀuh boh tŭ dưn pô dưi čăt đĭ mtah mda, mâo đang djam bi hơĭt klei hdĭp pô ƀuh klei hơ̆k mơak.

Ti plao ksĭ Đá Thị mâo sa war mnga điêt leh anăn siam, lu jing mnga mơar, mnga mẫu đơn leh anăn mnga sứ. Phung lĭng kahan mkra ƀăng jakg “plao ksĭ Đá Thị” hŏng mnư̆ kyâo mơ̆ng lĭng kahan, mnuih ƀuôn sang mkra êjai mmông wăn. War mnga mơ̆ng plao ksĭ Đá Thị siam êdi êjai thâo mđuĕ hluê yan adiê, êlan angĭn. . Thượng uý Mai Vũ Thanh Nguyên, khua gĭt gai lĭng kahan plao ksĭ Đá Thị, brei thâo:

Angĭn mơ̆ng ngŏ dưr hmei mdưm war mnga nah nei čiăng đuê̆ kơ angĭn. Mlan 5 jing angĭn mơ̆ng yŭ  hmei ba war mnga ti anôk dih čiăng đuĕ kơ angĭn, rơ̆ng klei êđăp ênang kơ ana mnga.

Ti krah êa ksĭ, mnâo hra đung mbĭt hŏng angĭn, mnâo êa, êwa, grăp anôk truh, wăt kơ plao ksĭ amâodah sang đung DK1-19, dŭm êpul ngă bruă bi kngar êdi êjai dlăng kơ dŭm đang djam mtah mda, huôm ksu dăp khuăt hŏng mjeh djam mrâo čăt. Tinei, djam puăn, djam mlăng prŏng hĭn mkă hŏng pla ti lăn hang. Yan bhang ti plao ksĭ sui, truh kơ mlan 8 - 9 kơh mâo hjan, phung lĭng kahan klei ƀăng dơr brŏng ksu čiăng mgơ̆ng êa hjan, yua hlăm aguah tlam amâodah krih djam.

Eh kan leh anăn djah djâo dưi dơr djŏ hŏng hdră bhiăn kreh knhâo čiăng mkra hbâo pruê kơ djam mtam. Knŏng hŏng 78m2 lăn pla djam ti plao ksĭ Cô Lin, phung lĭng kahan mâo êbeh 700kg djam hlăm sa thŭn, rơ̆ng bi mâo djăp djam ƀơ̆ng kơ phung lĭng kahan. Đại uý Nguyễn Xuân Hoàng, khua bruă kđi čar plao ksĭ Cô Lin brei thâo, brŏng mgơ̆ng êa dưi dăp mơ̆ng êngao truh kơ lam. Êa dưi mă jih hra srăng krih kơ phŭn djam.

Grăp hruê êngao kơ mmông mă bruă mơ̆ng anôk bruă, ayŏng adei ngă bruă pla djam, mđĭ hĭn klei mă bruă. Êngao kơ rông mnŭ, rông bip, ăt čiăng bi hơĭt klei hdĭp kơ ayŏng adei ti plao ksĭ. Plao ksĭ ăt rông 9 drei asâo, ba truh klei hơ̆k mơak leh sa hruê mă bruă suăi êmăn, rông mnŭ, rông ŭn leh anăn bip čiăng mâo klei hơ̆k mơak leh sa hruê mă bruă suăi êmăn.

Găn êa poh yă kpoh hlăm mran ba êpul ngă bruă mrô 9 nao ti dŭm plao ksĭ, hmei dưi đru hŏng dŭm plao ksĭ đung mtah êđăp, hŏng êyui ana kyâo mtah msĕ si plao ksĭ Sinh Tồn, plao ksĭ Tây A, Song Tử Tây leh anăn plao ksĭ Trường Sa. Tinei mâo djăp dŭm mta ana ƀơ̆ng boh msĕ si: tei hung, boh đung, soai, kbâo, kruê̆ hruê̆, boh kbruôn, mbĭt hŏng dŭm pruê̆ kyâo mtah mâo ti Trường Sa msĕ si ana bàng, phung ba, ana tra, ana nhau, phi lao, boh đung, mù u. Amai Lê Thị Kim Thi, dôk hdĭp ti plao ksĭ Sinh Tồn brei thâo:

Mphŭn kâo ăt mĭn klei hdĭp ti plao ksĭ jing dleh dlan, ƀiadah hriê kơnei ƀuh ana kyâo mtâo siam êdi. Lĭng kahan hŏng mnuih ƀuôn sang bi mguôp leh anăn thâo bi khăp hdơ̆ng pô.

Lăn pla djăm dưi dŭ mơ̆ng lăn hang, krih hŏng êa khăt, êa hjan. Mlan 2 truh mlan 5 jing yan djam hriê siam. Knhal jih thŭn hjan lu, ksĭ ksĭ tlă hlăm plao ksĭ ngă kơ ana djam brŭ phŭn, kyuanăn phung lĭng kahan leh anăn mnuih ƀuôn sang ba djam ti ti dlông hĭn čiăng ñĕ kơ êa ksĭ. Nai Trương Hồng Lĩnh, ti plao ksĭ Sinh Tồn brei thâo:

Pô pla mnga leh anăn pla ana bonsai, rông čĭm. Djam mtam doh êƀăt, amâo mâo krih êa drao, mâo wăt djăm djiă, djam knga kkuih, plăng, amrêč, hla bâo mnghir, djam phĭ, mâo lu mta sơnăk…

Lĭng kahan, mnuih ƀuôn sang ti plao ksĭ amâo djŏ knŏng bi sa ai gĭr pla lu djam mtam, ana bi êyui kluôm plao ksĭ ƀiădah lŏ bi hơĭt hnơ̆ng klei hdĭp kơ mnuih ƀuôn sang hdĭp tinei./.