VOV4.Êđê - Hluê si boh tŭ klei bi klă hnơ̆ng ai dưi bi ktưn gưl čar thŭn 2021, PCI mơ̆ng čar Dak Nông đĭ leh 8 gưl mkă hŏng thŭn dih, dăp ti knhal tuč dưi kpưn đĭ mŭt hlăm êpul kah knar ti ala čar. Lŏ čuê kơ boh tŭ dưn anei čar Dak Nông dôk gĭr jih ai hlăm bruă bi jăk wăl duh bi liê, mnia mblei čiăng iêo mthưr phung duh bi liê, mkŏ mjing bi kdlưn hĭn hlăm bruă duh mkra ala ƀuôn.

Nguyễn Đức Lộc, Knơ̆ng khua kiă kriê knơ̆ng bruă Vạn Thương čar Daknông, brei thâo, phung duh mkra mâo ngă leh bruă hŏng Daknông mơ̆ng 3 thŭn êlâo leh, ƀiădah truh knhal jih thŭn 2021, klă sĭt knŏng mrâo nga mă dua mta bruă duh bi liê hŏng čar. Leh hdră Daknông êpa mhao duah klei duh bi liê klă sĭt mâo leh klei bi mlih prŏng mơ̆ng gưl khua kiă kriê čar truh kơ dŭm knơ̆ng dhar bruă jih ai tiê bi mă bruă hĭn mkă hŏng êlâo, lehanăn pral mâo mghaih msir djăp mta hră mơar hŏng phung duh mkra hriê duh bi liê. Ară anei hmei hlăk ngă dŭm mta bruă dưi mâo leh hră klei dưi duh bi liê, jing sa alŭ wăl duh mkra prŏng Gia Nghiã lehanăn sa anôk mkra mjing kyâo, lehanăn kram alê kpĭ ti Tuy Đức.

Hlăk dôk rŭ mdơ̆ng sa blư̆ dua boh sang êa drao ti ƀuôn prŏng Gia Nghiã, lehanăn ti kdriêk Čư̆ Jŭt, hlăm čar Daknông, nai prĭn Aê mdrao Nguyễn Văn Châu, Knơ̆ng khua kiă kriê sang êa drao Xuyên Á, lač klei tal êlâo êdah êdi hŏng čar anăn jing dưn yua pral klei phung duh mkra hriê duh bi liê. Sitôhmô kơ klei bi tuôm hŏng khua knơ̆ng bruă sang čư̆ êa čar Daknông, ñu brei thâo, klei hur har mơ̆ng phung khua kiă kriê čar mtrŭt leh phung duh mkra kut kat duh bi liê mtam kơ bruă rŭ mdơ̆ng sa boh sang êa drao kơ čar anei. Kơ boh klei ară anei, jing lŏ bi lar bruă anei hŏng phung khua kiă kriê čar truh hŏng djăp knơ̆ng dhar bruă, dưi ngă mbĭt bruă knuă hŏng phung duh bi liê. Bruă mghaih msir hră mơar hŏng klei pral, čŏng ngă mtam hlăm dŭm mta snei. Nguyễn Văn Châu lač: Klei phung duh mkra čiăng êdi jing bruă ngă hră mơar bi pral! Pral lehanăn klă mngač, kpă ênuah, ngă amâo mâo mdei hlăm djăp bruă, čiăng kơ phung duh bi liê mâo mă bruă hŏng klei pral. Khădah klei ngă hră mơar tui si klei čoh čuăn jing lu, năng bi mă bruă hŏng klei mngač, klei duh bi liê anei dŭm mta hră mơar mâo, duh kơ bruă anei si srăng ngă snăn brei bi mngač mơh. Ktang mngač hlăm klei ngă bruă, snăn klei đăo knang knư̆ hĭn mơh, mmông anăn mă bruă amâo lŏ huĭ soh ôh.

Tui si klei ksiêm wĭt brei ƀuh ai bi ktưn ti gưl čar thŭn 2021, PCI mơ̆ng čar Daknông truh 61.95 puăng, dôk tal 52/63 boh čar, ƀuôn prŏng hlăm kluôm ala, đĭ leh 8 knhuang mkă hŏng thŭn êlâo. Mơ̆ng êpul dăp jing knhal tuič, čar mâo kpưn đĭ leh dôk ti hnơ̆ng man dưn. K’iăng khua čih hră Êpul hgŭm bruă duh mkra mnia mblei Việt Nam Đậu Anh Tuấn, lač, Daknông mâo leh lu klei bi mlih ai bi ktưn gưl čar jăk êdi lehanăn kluôm ênŭm. Hlăm jih ênoh bi ktưn mâo 7 mrô tĭng puăng, 6 mrô tĭng ênoh knhuang, boh nik klei tĭng kơ ênoh pral hlăm bruă mơ̆ng dŭm anôk bruă sang čư̆ êa, kơ hrue mmông mă bruă, kơ klei hlue ngă klei bhiăn đĭ hĭn leh mâo 20 knhuang mkă hŏng thŭn êlâo. Klei dôk bi tĭng ară anei phung duh mkra čiăng duh bi liê hlăm alŭ wăl adôk hrông djưt msĕ hŏng hđăp ti Daknông, jing klei găl kơ čar mă klei hriăm kơ klei tŭ jing mrâo:Kâo ƀuh Daknông ka jing sa boh čar ba akŏ ôh hlăm klei iêo jak bruă duuh bi liê, ƀiădah Daknông ngă hŏng klei pral leh. Kreh ƀuh phung duh bi liê srăng ruah ti alŭ wăl mâo klei găl hĭn kơ phung duh mkra ngă bruă, anăn jing amâo mâo djŏ klei găl anôk duh mkra ôh, ƀiădah ti anei jing mơ̆ng anak mnuih, mâo klei thâo bi mguôp mbĭt dơ̆ng mơ̆ng phung khua kiă kriê alŭ wăl. Daknông ăt êpa mhao lehanăn mâo leh sa hdră klă mngač čiăng iêo jak, mtrŭt mjhar, mđĭ ai hŏng klei tŭ jing djăp mta bruă prŏng, lehanăn anei mơh jing hdră êlan srăng mjing klei mlih mrâo hlăm čar hlăm wưng kơ anăp.

Tui si Hồ Văn Mười, Khua knơ̆ng bruă sang čư̆ êa čar Daknông, jih jang klei bi mlih PCI leh êgao mjing leh boh kdrŭt prŏng čiăng kơ čar ktang hĭn. Phung khua kiă kriê čar lehanăn dŭm knơ̆ng dhar bruă lŏ dơ̆ng bi tuôm jêñ jêñ hŏng phung duh mkra, ksiêm dlăng ruh mgaih ya mta bruă dôk dleh kpăk. Hŏng ai tiê thâo bi đru, duah klei djŏ, Daknông srăng mđing hmư̆ klei blŭ mơ̆ng phung duh mkra, êmuh klei kčĕ mơ̆ng phung thơ̆ng kơ bruă, lehanăn hriăm êmuh mơ̆ng dŭm čar mkăn đĭ kyar leh hlăm bruă duh bi liê kơ PCI... Čiăng tui duah hdră êlan duh bi liê jăk hĭn. Hồ Văn Mười lač, Daknông kut kat mjing kơ Daknông jing anôk duh bi liê jăk, čiăng kơ phung duh mkra kla sĭt mâo klei găl ênưih, klă mngač, mjing klei đăo knang kơ digơ̆ ngă bruă hŏng klei hơĭt lehanăn đĭ kyar. Khădah mâo leh klei đĭ kyar jăk msĕ snăn, ƀiădah lŏ dlăng wĭt klei tŭ dưn tal êlâo đuič. Ară anei dah bơ̆k bâo kơ Daknông snăn arăng ƀuh sơăi klei găl prŏng, lehanăn lu klei lông dlăng mơh. Drei bi mđĭ mlih, mghaih msir bi jih klei lông dlăng anei, jing hŏng klei gĭr bi mâo klei bi mguôp hĭn. Ară boh sĭt ƀuh jing phung khua kiă kriê čar lehanăn dŭm dhar bruă ti Daknông trŭn kơ bruă hŏng klei kut kat leh đru kơ phung duh mkra, ƀiădah jih klei anăn adôk ka ênŭm ôh, čiăng lŏ djăp gưl phung khua kiă kriê nao truh hlăm dŭm boh să, ƀuôn hgŭm bi mđrăm mbĭt ngă bruă, sĭt nik kâo đăo knang srăng mâo klei tŭ jing prŏng hĭn./.

Y-Khem pô mblang