Klei hưn năng m’ak hluê mrô mơ̆ng Knơ̆ng bruă hiu čhưn ênguê ala čar Việt Nam brei ƀuh, leh 11 mlan thŭn 2023, anôk bruă hiu čhưn ênguê Việt Nam drông leh 11,2 êklăk čô tuê ala tač êngao lehanăn hlăm brô 100 êklăk čô tuê hlăm ala čar, êbeh 11 êklăk čô tuê ala tač êngao, đĭ êbeh 4 blư̆ mkă hŏng thŭn 2022. Knŏng tĭng truh kơ jih mlan 10/2023, anôk hrui wĭt mơ̆ng bruă hiu čhưn ênguê mâo 556 êbâo êklai prăk. Nguyễn Công Hoan – Khua Dhar bruă hâo hưn Êpul hgŭm Hiu čhưn ênguê Việt Nam brei thâo, mâo 4 tur knơ̆ng čiăng dưi mâo mta kñăm drông mơ̆ng 12 truh kơ 13 êklăk čô tuê ala tač êngao hlăm thŭn anei:

 “Tĭng kơ Anôk bruă atăt tuê hiu čhưn, tinei hmei ƀuh srăng hmăi jăk truh kơ hdră mă bruă ti anôk hmei. Bruă mkra mđĭ wưng dôk mơ̆ng visa ti Việt Nam klă sĭt jing sa klei găl hlăk hdră bi ktưn mmiă lu snăk mơ̆ng anôk bruă hiu čhưn ênguê ară anei. Gơ̆ srăng mjing klei găl kơ phung tuê hiu čhưn ruah hriê ti Việt Nam lŏ mâo lu hruê mmông nao hgŭm hlăm hdră hiu čhưn amâo djŏ knŏng ti Việt Nam ƀiădah dŭm ala čar riêng gah mơh.

Čiăng lŏ dơ̆ng đĭ kyar kjăp ktang lehanăn mjing boh kdrŭt hlăm thŭn 2024, hluê phung thơ̆ng kơ bruă lehanăn anôk bruă atăt tuê hiu čhưn, anôk bruă duh mkra, dŭm alŭ wăl lehanăn phŭn, dhar bruă brei mđing kơ dŭm bruă klam yuôm bhăn. Ti anăp, wưng anei jing wưng “Yuôm bhăn” jak iêu lu phung tuê hiu čhưn ala tač êngao, kyua anăn brei pŏk ngă tŭ dưn Hdră mtrŭn mrô 82 mơ̆ng Knŭk kna hŏng lu hdră msir kjăp ktang. Mbĭt hŏng Hà Nội lehanăn ƀuôn prŏng Hồ Chí Minh, dŭm alŭ wăl ăt mtrŭt mđĭ dŭm hdră kkuh drông Thŭn mrâo kñăm jak iêu lu phung tuê hiu čhưn. Nguyễn Trùng Khánh – Khua knơ̆ng bruă hiu čhưn ênguê ala čar Việt Nam brei thâo:

 “Hlăm wưng mâo lu tuê hiu čhưn mơ̆ng ala tač êngao jing mơ̆ng mlan 10 thŭn êlâo truh kơ mlan 4 thŭn êdei. Dŭm anôk bruă duh mkra hiu čhưn ênguê Việt nam dôk hluê ngă hdră mprăp dŭm hdră hiu čhưn mrâo lehanăn mtrŭt mđĭ hdră hưn mthâo truh kơ wăl anôk atăt tuê hiu čhưn kơ mta kñăm boh nik nao hgŭm hlăm sang mnia hiu čhưn prŏng, mâo klei găl dưi tui ksiêm wăl anôk hiu čhưn ala tač êngao prŏng thơ̆ng kơ bruă mdê mdê.

Lŏ dlăng wĭt thŭn 2023, khădah hdră jak iêu phung tuê hiu čhưn ala tač êngao đĭ kyar lu ƀiădah boh sĭt, ênoh anei ƀiă hĭn mkă hŏng dŭm ala čar hlăm krĭng wăl. Hluê si Vũ Thế Bình – Khua Êpul hgŭm bruă hiu čhưn ênguê Việt Nam, mbĭt hŏng bruă lŏ dơ̆ng jak iêu tuê hiu čhưn ênguê kreh hriê, brei mâo hdră iêu jak tuê hiu čhưn mơ̆ng krĭng Ơrôp lehanăn ti dŭm anôk mkăn.

 “Tuê hiu čhưn ala tač êngao jing sa hlăm dŭm mta kñăm yuôm bhăn mâo Anôk bruă hiu čhưn ênguê Việt Nam mđing truh. Čiăng dưi drông tuê hiu čhưn ala tač êngao brei mâo hdră hiu čhưn mrâo djŏ guôp hŏng tuê ala tač êngao. Wăl anôk anei mâo lu klei bi mlih amâo djŏ knŏng giăm ƀiădah ti dŭm anôk kbưi ăt yuôm bhăn mơh.

Hŏng wăl anôk hiu čhưn hlăm ala čar, khădah thŭn 2023 mâo klei đĭ kyar ƀiădah hluê anôk bruă atăt tuê hiu čhưn, ênoh hrui wĭt mơ̆ng bruă hiu čhưn ênguê hlăm ala čar ka dưi ba wĭt msĕ hŏng klei čang hmăng kyua bruă duh mkra dôk dleh dlan, mnuih ƀuôn sang bi liê ƀiă, mđing kơ dŭm hdră đru mdul ênoh, nao čhưn ƀiă hruê bi hrô hŏng hdră hiu čhưn kbưi hlăm sui hruê. Čiăng jak iêu lu tuê hiu čhưn hlăm ala čar, Bùi Thanh Tú - Khua Marketing Anôk bruă hiu čhưn ênguê BestPrice brei thâo”

 “Tal sa hră đĭ êdeh phiơr truh kơ dŭm anôk hiu čhưn dưi bi hrŏ čiăng mtrŭt mđĭ hdră hiu čhưn. Drei dưi ƀuh hlăm thŭn 2023 mâo dŭm wưng prăk blei hră đĭ êdeh phiơr mơ̆ng Phú Quốc amâo dah Nha Trang đĭ lu hmăi truh kơ hdră hiu čhưn mơ̆ng phung tuê. Tal 2 jing klei đĭ kyar bruă hiu čhưn ênguê h’ĭt kjăp, krơ̆ng klei jăk siam hrông msă čŏng mâo, bi hrŏ klei duh bi liê lu đei ngă kơ phung tuê knŏng nao čhưn sa blư̆ leh yơh. Tal 3 anăn jing alŭ wăl brei mtrŭt mđĭ hdră hiu čhưn ênguê mguôp hŏng bruă bi mrâo hdră hiu čhưn čiăng jak iêu phung tuê; hlăm thŭn êgao, drei ƀuh Hà Nội hŏng Festival Thu Hà Nội, amâo dah Hruê knăm m’ak hiu čhưn ênguê Hồ Chí Minh ngă jăk leh hdră anei, kñăm jak iêu tuê hiu čhưn truh ti alŭ wăl pô.

Ti Anôk bi kƀĭn mđĭ kyar bruă hiu čhưn ênguê Việt Nam pral lehanăn h’ĭt kjăp leh êgao, Khua knŭk kna Phạm Minh Chính mñă, hdră hiu čhưn ênguê dưi bi mklă jing sa hdră duh mkra phŭn, đru mguôp yuôm bhăn mjing bruă mă, msir klei ư̆ êpa, bi hrŏ klei ƀun knap, jak iêu hdră duh bi liê, mtrŭt mđĭ kyar lehanăn bi mlih hdră mkŏ dăp mnơ̆ng pla, kriê pioh lehanăn mđĭ lar boh tŭ yuôm djuê ana, hƀuê ênuk lehanăn dhar kreh, mkra mđĭ klei hdĭp mnơ̆ng dhơ̆ng lehanăn ai tiê klei mĭn mnuih ƀuôn sang. Čiăng mđĭ kyar hdră hiu čhưn ênguê jing sa hdră duh mkra phŭn hluê aĭ tiê gĭt gai mơ̆ng Phŭn bruă kđi čar, hluê Khua knŭk kna, hdră hiu čhưn ênguê Việt Nam brei mâo klei bi mlih kơ hdră ngă hŏng dŭm hdră msir mrâo, mjing boh kdrŭt, bi knar, mđrăm mbĭt, tŭ dưn, hluê ngă “Hdră bi hgŭm kjăp, kluôm dhuôm”./.