Hluê si anôk bruă đăo knăl yan adiê čar Lâm Đồng, hlăm dŭm hruê êgao, ti alŭ wăl mâo hjan lu leh anăn prŏng. Hjan prŏng, mbĭt hŏng klei êngăp êa ti dŭm krĭng tlung, ktuê hnoh krông, klưh hrŏ lăn ti dŭm anôk kngư. Bruă sang čư êa čar Lâm Đồng mâo leh hră mtrŭn gĭt gai dŭm anôk bruă, alŭ wăl čŏng pô, hluê ngă dŭm hdră êlan gang mkhư̆ klei klưh hroh lăn, êa lip lêč.

Bruă sang čư êa dŭm kdriêk, ƀuôn prŏng Đà Lạt leh anăn Bảo Lộc gĭt gai ngă klei gak răng 24/24 hlăm yan hjan hlĭm, ktuê dlăn kjăp boh sĭt yan adiê, hmao hâo hưn truh kơ alŭ, ƀuôn, mnuih ƀuôn sang čiăng čŏng gang mkhư̆, bi mdrơ̆ng hŏng angĭn êbŭ, êa lip lêč, klưh hroh lăn, angĭn drŭng tơdah tam mâo hĕ.