VOV4.Êđê - Hjan prŏng hlăm lu mmông hlăm aguah mbruê 26/5 ngă leh kơ dŭm alŭ wăl ti 2 să Mỹ Đức leh anăn Dă pal hlăm kdriêk Dă Teh, čar Lâm Đồng êngăp hlăm êa. Dŭm pluh boh sang leh anăn dŭm êtuh ha ana kyâo pla mjing mâo klei hmăi.

Hluê si klei čih yap phŭn kčưm mơ̆ng anôk bruă djŏ tuôm, mâo 22 boh sang mnuih ƀuôn sang ti dŭm alŭ 5 leh anăn 7 mơ̆ng să Mỹ Đức leh anăn alŭ Xuân Châu ti să Dă Pal êa lip êlam truh kơ mkrah met. Hjan prŏng, êa đĭ ăt ngă kơ 270 ha ana kyâo pla mjing, lu hĭn jing ana hluăt mrai, ana ƀơ̆ng boh leh anăn dŭm ênao êa mơ̆ng mnuih ƀuôn sang ti anôk tlŭng êa lêč leh anăn jhat rai. Dŭm bĭt êlan hlăm alŭ, êlan ĐH95 găn nao să Dă Pal êa lêč, klưh hroh, boh nik jing dŭm bĭt êlan dôk mkra.

Y-Ƀel pô mblang