VOV4.Êđê- Hla čhiăm gru Hrah mtŭ kñĭ phiơr ti dŭm čuôr sang hlăm ƀuôn Drang Phôk, să knông lăn Krông Ana, kdriêk Ƀuôn Đon, čar Dak Lak jing klei jăk siam, bi mklă klei dưi yuôm bhăn knông lăn čar kwar. Dŭm pŏk hla čhiăm gru čar kwar mrâo dưi mđup brei hlăm hdră dŭm bruă ngă mlan tlâo knông lăn mơ̆ng bruă êdam êra 2 čar Dak Lak leh anăn Lâm Đồng mkŏ mjing, đru kơ mnuih ƀuôn sang mâo klei găl bi mlih hla čhiăm gru sô, čiăng kơ hla čhiăm gru hrah mtŭ kñĭ phiơr ti ƀuôn sang krĭng knông lăn.

Tŭ mă hla čiăng gru ala čar arăng mrâo mđup brei, amai H’Bô̆ Mlô, ti ƀuôn Drang Phôk, să Krông Ana, kdriêk Ƀuôn Đon mâo klei mơak sơnăk. Amai H’Bố brei thâo, ñu srăng kă mtam hla čiăm gru mrâo anei mlih kơ hla čhiăm gru leh sô siă. Lu thŭn êgao, kă hlă čiăm gru ala jing bruă ngă nanao mơ̆ng dŭm gŏ sang ti ƀuôn Drang Phôk, wăt kơ hruê yăng đar amâo dah wưng tết. Grăp gŏ sang kreh mă dŭm phŭn đrao dlông leh anăn kpă wĭt ngă giê kă hlă čhiăm gru ti anăp sang hŏng klei kdrưh kơang. Amai H’Ƀô̆ yal dliê:

        “Grăp thŭn hlăm ƀuôn sĭt arăng mbha hla čhiăm gru, sang kâo mă leh anăn kă ti anăp sang. Kâo ƀuh mâo klei mơak leh anăn yuôm bhăn êdi êjai mă hla čiăng gru, msĕ hŏng klei kdrưh kơang, bi klă klei dưi kiă kriê ala čar pô.”

Mđup brei hla čhiăm gru kơ mnuih ƀuôn sang ƀuôn Drang Phôk

Ƀuôn Drang Phôk jing ƀuôn taih kbưi hĭn ti kdriêk Ƀuôn Đon, dôk hjăn păn ti krĭng krah mơ̆ng krĭng dliê knŭk kna mkuôm Yŏk Đôn, mâo boh kbưi hŏng êlan knông lăn mbĭt hŏng ala čar Campuchia giăm 50 km. Hlăm ƀuôn mâo giăm 140 gŏ sang hŏng giăm 500 čô, hlăm anăn mâo 86% jing mnuih djuê ƀiă, Y-Tê Ƀuôn Krông, khua bruă Đảng nah gŭ ƀuôn Drang Phôk brei thâo, kyua mâo knŭk kna duh bi liê, dŭm thŭn giăm anei, ƀuôn Drăng Phôk mâo lu klei mlih, jing kdrưh kơang hĭn.

Bruă êdam êra čar Dak Lak leh anăn bruă êdam êra čar Lâm Đồng mdup brei 150 hla čhiăm gru čar kwar kơ mnuih ƀuôn sang ƀuôn knông lăn Drang Phôk hlăm hdră mlan 3 knông lăn thŭn anei

Boh nĭk hŏng klei hâo hưn mơ̆ng bruă sang čư̆ êa alŭ wăl, mnuih ƀuôn sang mâo leh klei mưng kă hla čhiăm gru ala čar ti anăp sang leh anăn ktuê êlan hlăm ƀuôn. Grăp blư̆ mâo hla čhiăm gru leh sô amâodah lă leh, mnuih ƀuôn sang lŏ dơ̆ng mlih hla čhiăm gru mrâo leh anăn kriê pioh jăk hĭn.

Hlăm dŭm hruê knăm prŏng, hruê yuôm bhăn leh anăn yan mnga akŏ thŭn srăng mâo hla čhiăm gru mrâo, kyuanăn mnuih ƀuôn sang kă hlă čhiăm gru drông thŭn mrâo, leh anăn hlăm dŭm hruê yuôm bhăn hŏng ai tiê mnuih ƀuôn sang mâo klei mơak sơnăk. Anei jing hdră hâo hưn klei khăp kơ ala čar leh anăn klei hing ang djuê ana, hơ̆k mơak hruê hnuk êngiê, mơ̆ng anăn dơ̆ng mlih klei mĭn leh anăn klei hdĭp mnuih ƀuôn sang mâo klei mlih hĭn.

Mnuih ƀuôn sang yuôl hla čhiăm gru ti anăp sang

Hlăm dŭm mta bruă mlan 3 krĭng knông lăn mrâo mkŏ mjing, bruă hđeh êdam êra čar Dak Lak leh anăn Lâm Đồng mđup brei leh 150 blah hla čhiăm gru ala čar kơ mnuih ƀuôn sang ƀuôn Drang Phôk. Anei jing bruă ngă mơ̆ng hđeh êdam êra 2 čar kñăm đru hlăm bruă hâo hưn klei khăp kơ ala čar, khăp kơ ƀuôn sang, mđĭ ai mnuih ƀuôn sang krĭng knông lăn mđing kơ ala čar, mkŏ mjing krĭng ƀuôn sang knông lăn ƀrư̆ hruê ƀrư̆ mdrŏng siam. Ayŏng Lê Pas Tơr, k’iăng khua bruă hđeh êdam êra čar Dak Lak brei thâo:

        “Hmei mđup brei leh dŭm blah hla čiăm gru ala čar kơ mnuih ƀuôn sang hdĭp mda ti alŭ wăl să Krông Na. Anei jing bruă ngă klă klơ̆ng mđĭ ai mnuih ƀuôn sang lŏ rơ̆ng kjăp klei đăo knang, ngă bruă hơĭt, hdĭp mda răng mgang klei dưi kiă kriê knông lăn ala čar.

Rup hla čiăm gru ala čar dôk phiơr hŏng êa mil mtah adiê krĭng knông lăn dưi bi mđĭ klei hơ̆k mơak hlăm grăp čô mnuih ƀuôn sang ti ƀuôn knông lăn Drang Phôk. Kă hlă čhiăm gru ala čar jing knhuah dhar kreh jăk siam, bi êdah klei khăp kơ ala čar leh anăn klei hdơr kơ phung jhŏng ktang êngiă asei kyua klei hnuk êngiê djuê ana, ala čar. Mơ̆ng anăn, mtrŭt kjham grăp čô mnuih ƀuôn sang, boh nik jing ênuh hđeh lŏ dơ̆ng đru mguôp čiăng mkŏ mjing leh anăn răng mgang ala čar.

Pô mblang: Y-Ƀel Êban