VOV4.Êđê - Ti Hà Nội mrâo mkŏ mjing Klei bi kƀĭn kluôm ala Dhar bruă djuê ana kơ phung êdam êra Việt Nam tal sa. Blŭ hră, hlăm klei bi kƀĭn, K’iăng Khua knŭk kna Vũ Đức Đam mñă klă: “Ktưn hưn ƀrư̆ prŏng, bruă klam prŏng hĭn mơh, Dhar bruă ala čar kơ êdam êra Việt Nam brei pŏk ngă dŭm bruă amâo djŏ knŏng kriê dlăng jăk kơ phung êdam êra ôh ƀiădah lŏ mđĭ lar ai ktang phung mda asei, klei mĭn mbruă, klei phung êdam êra Việt Nam duh myơr”. Ăt hlăm klei bi kƀĭn, mkŏ mjing leh Knăm hưn mdah Hdră mtrŭn 282 mơ̆ng Khua knŭk kna kčah kơ bruă klam, klei dưi leh anăn klei bhiăn ngă bruă mơ̆ng Dhar bruă ala čar kơ phung êdam êra Việt Nam.

Hđeh êdam êra Việt Nam ară anei mâo êbeh 22 êklăk 100 êbâo čô, hlăm brô 22,5% ênoh mnuih ƀuôn sang hlăm kluôm ala. Hđeh êdam êra alŭ wăl krĭng ƀuôn sang mâo giăm 60%, hđeh êdam êra krĭng ƀuôn prŏng mâo 40%. Hnơ̆ng phung hđeh êdam êra mâo bruă mă hlăm ênuk thŭn mă bruă mâo 98,7%. Dlăng kluôm, hđeh êdam êra mâo klei hơĭt, mâo klei đăo knang leh anăn sa ai hŏng dŭm hdră mtrŭn mơ̆ng Đảng, klei gĭt gai mơ̆ng knŭk kna, boh nĭk đăo kang kơ hdră mtrŭt mjhar, krŭ wĭt bruă duh mkra mơ̆ng knŭk kna srăng mâo boh tŭ dưn. Phung hđeh êdam êra mâo klei thâo tui hriăm, amâo mdei klei hriăm, gĭr ktưn čô̆ kơ bruă mă, hur har nao hgŭm hlăm dŭm mta bruă kyua yang ƀuôn, nao hgŭm gang mkhư̆ klei ruă tưp Covid-19, klei truh yan adiê, ƀrư̆ hruê brư̆ djŏ guôp hŏng klei mă bruă, klei mnia mblei, bi hriăm, mjĕ êrô hlăm wưng klei ruă tưp ăt dôk dleh dưi ksiêm dlăng.

Hlăm klei kƀĭn trông Dhar bruă ala čar kơ phung hđeh êdam êra gưl tal 1, phung bi ala čih yap, thŭn 2021, klei ruă tưp Covid-19 hmăi amâo jăk lu truh kơ phung hđeh êdam êra, truh kơ bruă tui hriăm, klei hdĭp mda wăt kơ prăk ba wĭt. Khădah sơnăn, ƀiădah dŭm mta bruă hđeh êdam êra mâo lu klei êdah êdi, hđeh êdam êra dưi bi êdah leh klei bi mguôp, hrăm mbĭt sa ai, mâo bruă klam hŏng knŭk kna leh anăn yang ƀuôn. Êngao kơ anăn, dŭm anôk bruă mâo leh klei gĭr ktưn mkŏ mjing bruă hđeh êdam êra hŏng hdră djŏ guôp, mkŏ mjing dŭm hră ktrâo lač klei bhiăn hđeh êdam êra thŭn 2020… Hluê si aduôn Nguyễn Thị Bích Ngọc, k’iăng khua phŭn bruă hdră êlan leh anăn duh bi liê, phung hđeh êdam êra ba anăp srăng nao mđrăm hŏng ênuk anei, čiăng mđĭ hĭn klei bi mguôp tar rŏng lăn, mtrŭt mđĭ klei mbruă hlăm klei čô̆ kơ bruă: “Phŭn bruă hdră êlan bi mguôp leh hŏng dŭm phŭn, dhar bruă, êpul êya čiăng mâo klei đru, bi mguôp hŏng êpul hgŭm hđeh êdam êra Việt Nam mkăp brei ngăn prăk đru kơ knơ̆ng bruă điêt leh anăn man dưn. Hruê mmông kơ anăp. Hmei srăng lŏ đru kơ phung hđeh êdam êra, hlăm anăn kñăm kơ bruă mtô mjuăt bi hriăm, dlăng kriê knơ̆ng bruă điêt leh anăn mrâo ngă bruă. Bi kơ hdră mđĭ kyar hđeh êdam êra wưng thŭn 2021 – 2030, drei čiăng mkŏ mjing hdră kčah čih yap boh tŭ hluê ngă”

Blŭ hlăm klei kƀĭn, k’iăng Khua knŭk kna Vũ Đức Đam mñă klă: Ară anei, hđeh êdam êra ka ênŭm 18 mâo leh klei thâo săng kơ lu mta bruă hĭn hŏng dŭm gưl phung êlâo. Anei jing klei lông dlăng kơ Dhar bruă ala čar kơ hđeh êdam êra Việt Nam. K’iăng Khua knŭk kna Vũ Đức Đam mtă, hruê mmông kơ anăp Dhar bruă leh anăn bruă hđeh êdam êra gưl dlông čiăng thâo săng klă hĭn, mkŏ mjing dŭm hdră ngă bruă kñăm bi lar klei thâo mbruă mơ̆ng hđeh êdam êra Việt Nam hlăm wưng mrâo.

Mñă ktang klei uêñ mĭn mơ̆ng knŭk kna leh anăn Khua knŭk kna hŏng phung hđeh êdam êra Việt Nam leh anăn bruă hđeh êdam êra. K ’iăng Khua knŭk kna Vũ Đức Đam mtă kơ dŭm phŭn, dhar bruă djŏ tuôm čiăng bi mguôp kjăp hĭn hŏng Dhar bruă ala čar kơ hđeh êdam êra leh anăn êpul hđeh êdam êra gưl dlông mkŏ mjing dŭm bruă ngă klă klơ̆ng, hluê djŏ hŏng ai tiê knŭk kna. K’iăng Khua knŭk kna Vũ Đức Đam mñă klă: “Hdră hluê ngă bruă hđeh êdam êra wưng mrâo, bruă ba mdah hdră kcah ksiêm ya hđeh êdam êra Việt Nam, bruă srăng ngă, hmăng hmưi êpul hđeh êdam êra ba anăp hlăm klei hluê ngă, dưn yua kdrăp mrâo mrang đru kơ klei ngă bruă mơ̆ng dŭm êpul hđeh êdam êra jing klă hĭn. Iêo mthưr mnuih mă bruă, hđeh êdam êra êdah êdi, bruă anei čiăng mâo klei bi mguôp kjăp plah wah bruă sang čư êa hŏng êpul êya čiăng mâo klei ngă bruă klă hĭn.

K’iăng knŭk kna Vũ Đức Đam hmăng hmưi hlăm bruă tui ngă dŭm bruă bi mguôp tar rŏng lăn mơ̆ng êpul hđeh êdam êra Việt Nam hŏng êpul hđeh êdam êra dŭm ala čar hlăm alŭ wăl leh anăn tar rŏng lăn, dŭm phŭn, dhar bruă čiăng bi mguôp ngă bruă ktang hĭn, čiăng kơ bruă anei dưi ti gŭ klei gĭt gai mơ̆ng knŭk kna.

Hlăm thŭn 2022, Dhar bruă ala čar kơ hđeh êdam êra Việt Nam ba mdah đa đa bruă klam kñăm msĕ si: Bi mguôp ksiêm duah, mkŏ mjing hdră ngă bruă, hdră êlan kơ phung hđeh êdam êra leh anăn bruă hđeh êdam êra, mkŏ mjing dŭm klei kƀĭn, klei blŭ hrăm hđeh êdam êra. Bi mguôp ngă bruă đru kčĕ hŏng dŭm phŭn, dhar bruă, alŭ wăl hlăm bruă hluê ngă klei bhiăn hđeh êdam êra thŭn 2020, dŭm hră mơar ktrâo lač klei bhiăn hđeh êdam êra thŭn 2020, hdră êlan mđĭ kyar hđeh êdam êra Việt Nam wưng thŭn 2021 – 2030. Mkŏ mjing klei ksiêm dlăng, ksiêm duah, čih yap bruă hluê ngă hdră mtrŭn, klei bhiăn ala čar hŏng phung hđeh êdam êra mơ̆ng ênŭm 16 thŭn kơ 18 thŭn leh anăn dŭm mta bruă mkăn, mkŏ mjing dŭm mta bruă hŏng tač êngao kơ bruă hđeh êdam êra.