VOV4.Êđê- Aguah mbruê 29/7, Êpul gĭt gai mơ̆ng gưl dlông kơ dŭm hdră ala čar kñăm mkŏ mjing klei kƀĭn trông êlan online hŏng dŭm alŭ wăl bi klă boh sĭt bruă hluê ngă dŭm hdră ala čar kñăm 6 mlan akŏ thŭn 2022, ba mdah dŭm bruă klam, hdră êlan 6 mlan knhal jih thŭn 2022. K’iăng Khua knŭk kna Phạm Bình Minh, khua êpul gĭt gai mơ̆ng gưl dlông kơ dŭm hdră ala čar kñăm wưng thŭn 2021 -2025 gĭt gai klei kƀĭn anei. Hlăm klei kƀĭn, khua gĭt gai dŭm phŭn, dhar bruă leh anăn dŭm alŭ wăl mâo leh klei hưn mdah, lač klă dŭm klei dleh dlan, êgun kpăk, kñăm bi trông, ba mdah dŭm hdră êlan kñăm mgaih msir dŭm klei dôk mâo hlăm hruê mmông êgao, čiăng mtrŭt bi hmar klei ngă bruă leh anăn boh tŭ dưn hluê ngă dŭm hdră ala čar kñăm 6 mlan akŏ thŭn 2022. K’iăng Khua knŭk kna Phạm Bình Minh mñă klă, dŭm phŭn, dhar bruă mjêč bi leh dŭm hră mơar ktrâo lač hluê si klei dưi čiăng kơ dŭm alŭ wăl mâo tur knơ̆ng hluê ngă, dŭm čar, ƀuôn prŏng gĭt gai ktang phĭt, hluê ngă mâo boh tŭ dưn 3 hdră ala čar kñăm, gĭr ktưn truh ti knhal jih thŭn bi leh bruă brei čan dŭm ênoh prăk dưi mkăp brei hlăm thŭn 2022.

Pô mblang: Y-Ƀel Êban