Êbeh 90 tuổi, ƀiădah pô mbruă êdah êdi Lò Văn Biến, djuê ana Thái ti ƀuôn Cang Nà, ƀuôn hgŭm Trung Tâm, wăl krah Nghĩa Lộ, čar Yên Bái grăp hruê ăt hur har mtô boh hră Thái đưm leh anăn klei kdŏ xoè đưm mnuih Thái kơ phung knuă druh leh anăn mnuih ƀuôn sang alŭ wăl. Ñu brei thâo, hlăm jih hdră gĭt gai cách mạng, gĭt gai bruă mkŏ mjing leh anăn mđĭ kyar lăn čar, Đảng drei dlăng myuôm leh anăn mđĭ bruă klam mơ̆ng Dhar kreh. Hlăm Klei bi kƀĭn dhar kreh kluôm ala mkŏ mjing hlăm mlan 11/2021, Khua gĭt gai Đảng Nguyễn Phú Trọng ăt lu blư̆ mñă klă “Dhar kreh jing tur knơ̆ng ai tiê mơ̆ng ala ƀuôn, dhar kreh anôk snăn djuê ana anôk, dhar kreh luč snăn djuê ana lucc”. Jiă kma ai tiê anăn, hŏng klei khăp, klei ktưn hưn kơ klei jăk siam dhar kreh djuê ana pô, ñu pioh jih klei hdĭp ksiêm hriăm, mtô mblang, kơrŭ wĭt klei dhar kreh jăk siam mnuih Thái. Biến lač:

 “Jing leh mnuih Thái snăn grăp čô brei thâo djuê ana pô mâo ya klei jăk siam. Phung khua mduôn, phung thâo snăn brei lŏ mtô kơ grăp čô ƀuh leh anăn hriăm”.

Êngao kơ Biến, ti wăl krah Nghĩa Lộ, čar Yên Bái ară anei, ti dŭm ƀuôn sang adôk lu phung amĭ ama, aduôn aê thâo săng êlam kơ dhar kreh jăk siam djuê ana Thái, mơ̆ng boh hră truh kơ ênhiang mmuiñ, klei kdŏ, kdrăp tông ayŭ, mnơ̆ng ƀơ̆ng, klei hlăp lêñ djuê ana… Diñu pioh leh lu ai tiê čiăng djă pioh, mtô kơ dŭm ênuk êdei hŏng klei čang hmăng klei dhar kreh anăn dôk lă lar.

 Ti Sơn La – krĭng lăn mâo 12 djuê ana hdĭp mda, jiă kma klei mĭn Khua gĭt gai Hồ Chí Minh “ Dhar kreh mtrang êlan kơ mnuih ƀuôn sang êbat” leh anăn gĭr hlue ngă êlan mơ̆ng Đảng hlăm klei mlih mrâo, mđĭ kyar dhar kreh Việt Nam, hlăm anăn mâo Khua gĭt gai Đảng Nguyễn Phú Trọng tuôm lu blư̆ bi mklă “dhar kreh adôk snăn djuê ana adôk, luč dhar kreh jing luč djuê ana”… dŭm thŭn êgao, gưl bruă đảng, bruă sang čư̆ êa leh anăn mnuih ƀuôn sang tinei mđing răng mgang, mđĭ kyar dŭm ênoh dhar kreh hŏng dŭm hdră, bruă ngă klă sĭt, klă klơ̆ng. Quàng Thị Xuyến, Khua Anôk bruă Dhar kreh - ala ƀuôn, Êpul gơ̆ng bruă ƀuôn sang čar Sơn la ăt brei thâo:

 “Truh ară anei, Êpul gơ̆ng bruă ƀuôn sang čar Sơn La mtrŭn leh 5 Hdră mtrŭn djŏ tuôm kơ hdră êlan đru răng mgang, mđĭ lar ênoh yuôm dhar kreh djuê ana. Êngao anăn, dŭm hdră êlan đru mđĭ kyar dhar kreh djuê ana dưi bi mguôp hlăm hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng. Êpul gơ̆ng bruă ƀuôn sang čar ăt jao kơ dŭm Anôk bruă hlăm Êpul gơ̆ng bruă ƀuôn sang čar ktuê dlăng nanao, grăp gưl hŏng bruă mbha, brei čan ênoh đru hŏng dŭm hdră mtrŭn djŏ tuôm kơ dhar kreh.

Hlăk dôk hdĭp, Khua gĭt gai Đảng Nguyễn Phú Trọng mđing snăk kơ bruă răng kriê leh anăn mđĭ lar dŭm ênoh yuôm dhar kreh djuê ana, dŭm ênoh yuôm dhar kreh êdah klă leh anăn amâo êdah klă mơ̆ng dŭm krĭng, kwar, mơ̆ng dŭm djuê ana, bi mguôp hŏng klei tŭ mă klei jăk siam dhar kreh ênuk leh anăn čang hmăng kơ êpul thâo hră mơar, kdŏ mmuiñ jih ai tiê, mâo klei thâo, mâo bruă klam mkŏ mjing tŭ jing sa dhar kreh Việt Nam mrâo mrang, jiă kma dhar kreh djuê ana. Hlăm klei bi kƀĭn dhar kreh kluôm ala thŭn 2021, Khua gĭt gai Đảng lu blư̆ mñă: “Dhar kreh jing mngăt êwa djuê ana, lač kơ dhar kreh jăk siam djuê ana. Dhar kreh anôk snăn djuê ana adôk…”

 Thâo săng kơ klei anăn, ayŏng Thạch Sroh ti să Đôn Châu, kdriêk Duyên Hải, čar Trà Vinh, jing sa čô hlăm Êpul hgŭm čih mkra kưt mmuiñ čar brei thâo, phung čih kač kdŏ muiñ Khmer hlăm wưng êgao mâo leh lu klei đru mguôp hlăm bruă răng mgang leh anăn mđĭ lar knhuah gru djuê ana. Hjăn ñu pô, hlăm wưng kơ anăp srăng lŏ dơ̆ng duh myơr kơ bruă dhar kreh. Kơ klei Khua gĭt gai Đảng Nguyễn Phú Trọng djiê leh, ayŏng Thạch Sroh bi êdah klei ênguôt hơưi:

 “Khua gĭt gai Đảng Nguyễn Phú Trọng êdah snăk, ñu mđing kơ dhar kreh djuê ana Việt Nam, boh nik mđing, mđĭ ai mnuih ƀuôn sang dŭm djuê ana răng kriê leh anăn mđĭ lar knhuah dhar kreh djuê ana pô. Ară anei, tơdah hmư̆ klei hâo hưn Khua gĭt gai Đảng djiê leh, kâo leh anăn mnuih ƀuôn sang Khmer ênguôt snăk, srăng hdơr kơ ai tiê ñu hŏng mnuih ƀuôn sang”.

 Pô mbruă êdah êdi Lâm Xuân ti să Tân Mỹ, kdriêk Trà Ôn, čar Vĩnh Long brei thâo, ñu mpŭ snăk kơ knhuah mă bruă mơ̆ng Khua gĭt gai Đảng Nguyễn Phú Trọng, jih ai tiê hlăm bruă knuă ƀiădah bŏ hŏng jĕ giăm. Boh nik, Khua gĭt gai Đảng Nguyễn Phú Trọng jih ai tiê mđing kơ bruă dhar kreh, mkŏ mjing, răng kriê klei jăk siam mơ̆ng dhar kreh, anak mnuih Việt Nam. Khua gĭt gai Đảng djiê leh, jing lăn čar luč leh sa čô mnuih mbruă, Đảng luč leh sa čô đảng viên, sa čô knuă druh jih ai tiê kyua lăn čar, kyua mnuih ƀuôn sang. Pô mbruă êdah êdi Lâm Xuân lŏ brei thâo:

 “Khua gĭt gai Đảng mâo ai tiê thâo pap, thâo khăp kơ jih jang mnuih djuê ƀiă, hlăm anăn mâo mnuih Khmer. Ñu mđing kơ bruă răng kriê leh anăn mđĭ lar dhar kreh djuê ana, amâo brei luč ram ôh. Kâo pô hdơr nanao kơ ai tiê Khua gĭt gai Đảng”.

 Bi Thạch Si Phone, Khua hđăp Êpul kdŏ mmuiñ Khmer Bạc Liêu brei thâo, jing sa čô ngă bruă hlăm klei kdŏ mmuiñ, kâo jih ai tiê mpŭ, hdơr kơ ai tiê Khua gĭt gai Đảng Nguyễn Phú Trọng hŏng dhar kreh djuê ana, mjing klei găl kơ phung kưt mmuiñ mâo klei mĭn mbruă, đru mguôp lu hĭn kơ klei čih kač kdŏ mmuiñ ala čar. Thạch Si Phone ênguôt hơưi brei thâo:

 “Khua gĭt gai Đảng Nguyễn Phú Trọng jing mnuih năng mpŭ. Ñu jih ai tiê kyua Đảng, kyua mnuih ƀuôn sang, hlăm anăn mâo mnuih djuê ƀiă leh anăn khăng lač hlăm Klei bi kƀĭn mơ̆ng Đảng bruă pŏk ngă Hdră mtrŭn kơ bruă dhar kreh. Ară anei ñu djiê leh, kâo pô ênguôt hnĭng snăk. Hŏng bruă klam jing sa čô ngă bruă hlăm klei čih kač kdŏ mmuiñ kâo gĭr ngă klei ñu čiăng hlăk dôk hdĭp, jing mđing uêñ leha năn pioh lu ai tiê klei mĭn kơ bruă mkŏ mjing leh anăn mđĭ kyar dhar kreh djuê ana Khmer”.

Khua gĭt gai Đảng Nguyễn Phú Trọng djiê jing sa klei luč liê prŏng hŏng Đảng, Knŭk kna, mnuih ƀuôn sang drei, phung čih kač kdŏ mmuiñ kluôm ala, hlăm anăn mâo phung kưt mmuiñ mnuih Khmer. Khădah snăn, mnơ̆ng kriê pioh leh anăn ai tiê Khua gĭt gai Đảng hŏng dhar kreh djuê ana ăt adôk snăn, jih jang drei brei mâo briă klam mkŏ mjing tŭ jing sa dhar kreh Việt Nam mrâo mrang, jiă kma dhar kreh djuê ana hlue si ai tiê Khua gĭt gai Đảng./.