VOV4.Êđê - Hŏng êbeh 1ha lăn pla mdiê kuê lehanăn pla djam mtam mtam dŭm mta, hlăm thŭn 2021, khădah tuôm hŏng lu klei dleh dlan kơ anôk hrui blei mnơ̆ng dhơ̆ng kyua hmăi mơ̆ng klei ruă Covid 19, ƀiădah kyua bruă pla pluă lu mta mnơ̆ng, gŏ sang K’Pin, ti să Dă Ron, kdriêk Đơn Dương (Lâm Đồng) ăt rơ̆ng kjăp hnư hrui wĭt kơ gŏ sang. Klă klơ̆ng, mjưh ruê̆ sa thŭn ngă bruă, tĭng jih ênoh bi liê hlăm bruă pla mjing, gŏ sang ñu lŏ mâo prăk mnga êbeh 60 êklăk prăk. Kyua anăn, têt hat gŏ sang ăt mprăp djăp ênŭm mnơ̆ng dhơ̆ng čiăng hơ̆k m’ak mbĭt hŏng ƀuôn sang. K’Pin lač snei: Ƀri gưl Têt anei, gŏ sang kâo pla 1 sao mnga, kăn lu mơh, ênoh čhĭ hluê wăl anôk mnia mblei yơh, pla ƀiă mâo ƀiă, pla lu mâo lu. Êngao pla mdiê, gŏ sang kâo ăt pla dŭm mta djam mtam. Khădah ênoh čhĭ mâo mmông đĭ mâo mmông trŭn, ƀiădah hnư hrui wĭt ăt đĭ. Têt truh gŏ sang kâo ăt mkŏ mjing msĕ hŏng sang mkăn, ya mnơ̆ng pô mâo pô yua mơ̆ng anăn yơh. Ăt mkra mnŭ, bip, dŭm čeh kpiê čiăng jak iêu ayŏng adei hlăm ƀuôn hriê čhưn, huă mnăm hŏng gŏ sang”./.

H’Nêč pô mblang