Aguah hruê 2/10, bruă Đảng čar Quảng Ngãi mkŏ mjing leh Klei bi kƀĭn hưn mthâo klei bi mklă mơ̆ng Phŭn bruă kđi čar kơ hdră knuă druh. Ti anôk bi kƀĭn, Hoàng Đăng Quang, kơiăng khua Anôk bruă mkŏ mjing gưl dlông hưn mthâo leh Klei bi mklă mơ̆ng Phŭn bruă kđi čar kơ hdră knuă druh. Hluê anăn, Phŭn bruă kđi čar ruah Hồ Văn Niên – kơiăng khua Phŭn bruă Djuê ana lehanăn klei đăo, nao hgŭm hlăm Anôk dlăng bruă Đảng čar Quảng Ngãi wưng thŭn 2025 – 2030 lehanăn păn ngă Khua bruă Đảng čar Quảng Ngãi wưng thŭn 2025 – 2030 bi hrô kơ Bùi Thị Quỳnh Vân mâo Phŭn bruă kđi čar tiŏ nao ruah mdưm păn ngă k’iăng khua Êpul bruă mkŏ mjing gưl dlông.

Hồ Văn Niên kkiêng hruê 15/10/1975; djuê ana Bahnar, ƀuôn sang čar Gia Lai, Hnơ̆ng hriăm Cử Cử nhân Luật, Cử nhân Lý luận Chính trị. Blŭ hrăm păn ngă bruă klam mrâo, Hồ Văn Niên, Khua bruă Đảng čar Quảng Ngãi mrâo lač, klei Phŭn bruă kđi čar ruah păn ngă Khua bruă Đảng čar Quảng Ngãi jing klei mơak prŏng êdi hŏng ñu. Hồ Văn Niên ƀuăn srăng krơ̆ng kjăp klei thâo hlăm bruă kđi čar, knhuah hdĭp, knhuah mă bruă jăk; mjing gru mngač, sai ai hŏng anôk kriê dlăng bruă Đảng čar mđĭ lar ai tiê hgŭm mguôp, hluê ngă tŭ dưn mta kñăm Hdră mtrŭn Klei bi kƀĭn bruă Đảng čar tal XX, wưng thŭn 2025 – 2030 kčah mtrŭn./.