Hlăm anôk dôk ngă bruă mrô 3, dôk hlăm kdrêč bruă mrô 3 êlan dơ̆ng pral Khánh Hòa – Ƀuôn Ama Thuôt, Knơ̆ng bruă rŭ mkra mrô 1 mâo tiŏ nao leh êbeh  60 čô kỹ sư lehanăn mnuih ngă bruă mbĭt hŏng 60 boh êdeh mă bruă djăp mta, nao mkra êlan hŏng klei mjêč pral. Nguyễn Đình Lợi, knuă duh kiă kriê bruă mkra êlan tinei lač.

“Ngă bruă tui si klei khua knŭk kna kiă kriê, jing knŏng bi trông nao hlăm bruă amâo mâo klei kdŭn ôh, gĭr găn jih mđiă hjan mă bruă hrue lehanăn mlam mbha ngă hlăm 4 êpul hlăm jih kdrêč bruă dôk ngă kñăm čiăng bi leh pral êlan dơ̆ng prŏng Khánh Hòa – Ƀuôn Ama Thuôt, kyuanăn yơh phung ayŏng adei mă bruă, mbĭt hŏng jih jang phung kỹ sư mnuih ngă bruă, phung mgăt êdeh jih ai tiê mă bruă djŏ tui si klei khua knŭk kna gĭt gai. Jih jang klei dleh dlan êjai dôk ngă bruă msĕ si mđiă hjan, msĕ si bi lač, hjan diêt yap msĕ si amâo mâo hjan, tơdah hjan prŏng yap jing msĕ si hjan ƀiă, snăn bi kă ƀaih ăt mă bruă”.

Klam ngă bruă hlăm kdrêč bruă mâo boh taih 16,5Km hlăm alŭ wăl čar Daklak lehanăn 22km hlăm čar Khánh Hòa, Nguyễn Viết Hải, Khua êpul gơ̆ng kiă kriê bruă knuă mơ̆ng êpul grŭp Sơn Hải brei thâo, êpul grŭp ktuh êyuh leh jih ai tiê, mă bruă hrue lehanăn mlam ktưn čiăng bi leh kdlưn hĭn hŏng hdră kčah:

“Hmei ƀuăn mkra êlan Nha Trang – Ƀuôn Ama Thuôt hlăm kdrêč bruă tal 3 srăng bi leh hlăm thŭn 2025, sitôhmô êlâo kơ wưng kčah hlăm sa thŭn, tui si čuăn hlăm thŭn 2026. Lehanăn bruă mkra êlan Nha Trang – Ƀuôn Ama Thuôt hlăm kdrêč bruă mrtô 1 găn Khánh Hòa 22km mkŏ mơ̆ng êlan dơ̆ng prŏng mrô 1 truh hŏng êlan dơ̆ng prŏng mrô 26 hmei ƀuăn bi leh pral hlăm thŭn 2025.”

Bruă mkra êlan dơ̆ng pral Ƀuôn Ama Thuôt-Khánh Hòa hŏng boh taih 117,5km, mâo 3 kdrêč bruă phŭn, dưi rŭ mkra mơ̆ng mlan 6 thŭn 2023, tĭng srăng bi leh hlăm thŭn 2026. Truh kơ ară anei kdrêč bruă tal 1 mâo knơ̆ng bruă sang čư̆ êa čar Khánh Hòa jing pô duh bi liê hŏng ênoh tŭ dưn bruă knuă truh 20%; kdrêč bruă tal 2 mâo phŭn bruă êlan klông jing pô duh bi liê mâo ênoh tŭ dưn bruă knuă giăm 7%; kdrêč bruă tal 3 mâo knơ̆ng bruă sang čư̆ êa čar Daklak jing pô duh bi liê hŏng ênoh tŭ dưn bruă knuă êbeh 15%.  Phạm Ngọc Nghị, Khua knơ̆ng bruă sang čư̆ êa čar Daklak brei thâo, klei mkra êlan dơ̆ng hlue hŏng hdră mtrŭn mrô 89/NQ-CP hrue 25/7/2022 mơ̆ng knŭk kna.

“Sa ai hŏng klei bi ktưn mâo khua knŭk kna mtrŭt mjhar, čar Daklak mâo leh klei ƀuăn, lŏ dơ̆ng hŏng jih ai tiê ngă bruă hlăm klei ksiêm dlăng, mtrŭt mjhar, mjing djăp klei găl čiăng kơ jih jang dŭm êpul êya ngă bruă, mâo klei kăp kčĕ kjăp. Kâo đăo knang sĭt, hŏng klei khua knŭk kna gĭt gai jih ai ênai, mâo klei đru mơ̆ng dŭm phŭn dhar bruă gưl dlông, klei kut kat mơ̆ng dŭm anôk bruă êpul êya djŏ tuôm, lehanăn klei bi sa ai mơ̆ng mnuih ƀuôn sang djăp djuê ana hlăm čar, sĭt nik bruă mkra êlan hlăm kdrêč bruă tal 3 srăng bi leh hlăm thŭn 2025 lehanăn jih jang bruă knuă adôk hlăm klei mkra êlan dơ̆ng pral Khánh Hòa - Ƀuôn Ama Thuôt gưl tal 1 srăng bi leh djŏ hŏng hdră kčah mtrŭn”.

Hŏng klei mđing uêñ lehanăn klei gĭt gai kjăp mơ̆ng gưl dlông lehanăn alŭ wăl, mâo klei čŏng kut kat, jih ai tiê mă bruă mơ̆ng phung duh bi liê, phung ngă bruă, sĭt nik bruă mkra êlan dơ̆ng pral Khánh Hòa – Ƀuôn Ama Thuôt srăng dưi bi leh êlâo kơ hrue kčah, djŏ si klei mnuih ƀuôn sang dôk čang hmăng./.