VOV4.Êđê - Hrue mbrue (11/8), ti anôk bruă Êpul gơ̆ng hlak mblang gưl dlông, Khua lăn čar Nguyễn Xuân Phúc, jing khua kiă kriê bruă mkra mjing “Hdră êlan rŭ mdơ̆ng knŭk kna ti gŭ klei bhiăn yang ƀuôn ngă phŭn Việt Nam truh kơ thŭn 2030, lehanăn tă êlan truh kơ thŭn 2045”, kiă kriê jih jang bruă mơ̆ng êpul čih mkra hŏng Êpul gơ̆ng bruă hlak mblang gưl dlông, mâo leh klei bi tŭ ư kơ klei čih, djŏ hŏng klei kreh knhâo, mâo klei ngă phŭn êngiê mơ̆ng êpul čih mkra.

Khădah ăt adôk lu mta klei năng lŏ ksiêm wĭt mlih mkra, čiăng bi djŏ, mâo klei kreh knhâo, mâo klei bi tŭ ư prŏng mơ̆ng Êpul Gơ̆ng bruă hlak mblang gưl dlông, boh nik mơ̆ng klei bi kčik mblang, ksiêm bi mklă klei jing sĭt kơ bruă, jih jang hdră êlan pioh mdưm hlăm hdră mtrŭn. Mâo leh lu klei blŭ bi tŭ ư, hŏng dŭm klei blŭ mgang, klei hlak mblang, lehanăn klei ktrâo atăt kơ hdră hlue ngă, mơ̆ng Êpul khua kiă kriê kơ dŭm mta bruă adôk mâo klei blŭ mdê mdê. Khua lăn čar mtă Êpul čih mkra lŏ dơ̆ng tŭ mă, lehanăn bi mbŏ jih jang klei blŭ tui si Êpul Gơ̆ng bruă hlak mblang gưl dlông kčĕ čiăng lŏ bi leh jih jang hdră êlan./.

Y-Khem pô mblang