Anei jing dŭm boh sang mâo Knơ̆ng bruă pui kmlă Kwar Krah (EVNCPC) đru prăk mkŏ mjing hlăm thŭn 2023. Hlue anăn, grăp boh sang mâo bruă pui kmlă đru 60 êklăk prăk, bruă sang čư̆ êa alŭ wăl hŏng gŏ sang, mnuih ƀuôn sang mguôp ai tiê đru mguôp pưk sang prŏng siam.

Mbĭt hŏng bruă đru mkŏ mjing pưk sang, pui kmlă Dak Lak lŏ mđup brei kơ grăp boh sang 1 tivi hŏng dŭm kdrăp pui kmlă yua grăp hruê. Dưi thâo mbĭt hŏng Dak Lak, hlăm thŭn 2023, EVNCPC đru mkŏ mjing 70 boh sang klei khăp mđup brei kơ dŭm gŏ êsei ƀun, gŏ sang knŭk kna dlăng ba ti 13 čar kwar Krah leh anăn Lăn Dap Kngư, hŏng ênoh prăk êbeh 4,2 êklai prăl. Dŭm boh sang mrâo đru leh kơ dŭm gŏ sang hơĭt anôk dôk, mâo klei găl gĭr ktưn hgao klei dleh dlan. Hlăm hruê mâo sang mrâo, Y Dăm Čil, ti ƀuôn Dơng Kniêng, wăl krah Liên Sơn, kdriêk Lăk, čar Dak Lak mgei ai tiê:

“Bi mni kơ Knơ̆ng bruă pui kmlă Dak Lak bi liê, đru kơ gŏ sang, leh anăn mni lač jăk kơ bruă sang čư̆ êa alŭ wăl leh anăn mnuih ƀuôn sang đru hmei mkra sang. Mơ̆ng ară anei gŏ sang amâo lŏ dleh dlan hlăm yan adiê hjan, mđiă ôh; mô̆, anak hơĭt ai tiê mă bruă, hriăm hră mơar. Kâo mơak snăk leh anăn sa blư̆ dơ̆ng mni lač jăk kơ Knơ̆ng bruă pui kmlă Dak Lak mđing đru”.