Êpul bruă djŏ tuôm dôk tui tiŏ phung ngă soh, lehanăn hlăk jih ai tiê tui duah phung adôk čiăng mghaih msir hŏng klei ktang tui si hdră bhiăn knŭk kna.

Bruă sang čư̆ êa alŭ wăl dôk ngă leh djăp hdră kñăm bi hơĭt boh klei, pral čua êmuh, đru ba dŭm gŏ êsei mâo mnuih djiê, mnuih êka, hưn mthâo, mđĭ ai mnuih ƀuôn sang brei mâo ai tiê êđăp ênang, amâo mâo kdjăt kƀla, kăp hlue ngă djŏ tui si anôk bruă mâo klei dưi ktrâo atăt.

Bruă Đảng čar, Êpul Gơ̆ng bruă ƀuôn sang, Knơ̆ng bruă sang čư̆ êa, knơ̆ng bruă mặt trận čar mâo klei ƀuah ăl ktang phĭt klei ksŭng ngă kơ anôk bruă knŭk kna, mdjiê mnuih, ngă soh prŏng êdi hŏng hdră bhiăn knŭk kna mơ̆ng êpul ngă klei anăn, lehanăn mâo mơh klei bi juh truh hŏng dŭm klei ênguôt hnĭng lehanăn klei luič liê prŏng prĭn mơ̆ng găp djuê kahan ksiêm, knuă druh lehanăn mnuih ƀuôn sang.

Čar Daklak iêo mthưr kơ mnuih ƀuôn sang, lehanăn lĭng kahan hlăm čar brei mâo klei thâo bi mguôp sa ai tiê, đăo knang kơ hdră êlan mơ̆ng Đảng, kơ klei gĭt gai mơ̆ng dŭm gưl bruă Đảng, klei kiă kriê mơ̆ng bruă sang čư̆ êa djăp gưl. Hgŭm kjăp hlăm bruă “Jih jang mnuih ƀuôn sang bi răng mgang klei êđăp ênang lăn čar”, dưn yua jih ai ktang klei găl jih jang mnuih ƀuôn sang bi răng mgang klei êđăp ênang lăn čar lehanăn klei êđăp ênang yang ƀuôn mâo klei bi mguôp kjăp hŏng dŭm êpul bruă djŏ tuôm dô kngă bruă čuăn, mđrăm mbĭt bi đru, bi juh phung mâo klei truh, găp djuê kahan ksiêm, knuă druh lehanăn mnuih ƀuôn sang mâo klei truh; hơĭt ai tiê duh ƀơ̆ng mă bruă knuă đru hlăm klei bi hơĭt, mđĭ kyar alŭ wăl pô. Amâo mâo duah bi lar, amâo duah bi hing ôh ya mta klei hlăm hla pŏk yang ƀuôn, tơdah klei anăn ka thâo klă nik, huĭdah ba klei amâo jăk kơ dŭm êpul bruă djŏ tuôm dôk ngă bruă, lehanăn ba klei kdjăt kƀla huĭ hyưt hlăm mnuih ƀuôn sang; brei mâo klei thâo răng, điêt đuôt “Amâo mâo hmư̆, amâo mâo tŭ, amâo mâo hlue” klei phung lhiăr, phung bi roh duah êlan mjhua hŏng klei anei mčŭt mčhur, ktŭng ba ngă klei bi kdơ̆ng hŏng knŭk kna, ngă luič klei êđăp ênang bruă kđi čar hlăm alŭ wăl.   

Drei knang sĭt kơ knhuah gru mâo leh mơ̆ng đưm klei thâo khăp kơ lăn čar, mâo klei thâo bi mguôp ti gŭ klei kiă kriê mơ̆ng Đảng, lehanăn bruă sang čư̆ êa, lĭng kahan lehanăn mnuih ƀuôn sang djăp djuê ana hlăm čar sĭt nik srăng dưi găn jih klei dleh dlan, klei lông dlăng, rŭ mdơ̆ng čar Daklak knư̆ hrue knư̆ đĭ kyar./.