VOV4.Êđê- Ƀri bi hdơr 132 thŭn Hruê kkiêng Khua gĭt gai Hồ Chí Minh (19/5/1890 - 19/5/2022), hruê 19/5, Hră klei mrâo điện tử Đảng Cộng sản Việt Nam klă klơ̆ng hưn mthâo hla phŭn mrâo Mbah hâo hưn điện tử Hồ Chí Minh kñăm lŏ dơ̆ng mlih mrâo, mđĭ hnơ̆ng tŭ, hdră hưn mthâo kñăm mkăp kơ klei čiăng dlăng mơ̆ng mnuih ƀuôn sang hlăm lehanăn êngao ala čar.

Nguyễn Trọng Nghĩa, Khua bruă Đảng gưl dlông, Khua anôk bruă kiă kriê klei hâo hưn gưl dlông nao lehanăn blŭ hrăm ti knăm anei. Blŭ gĭt gai knăm anei, Nguyễn Trọng Nghĩa mtă kơ Hră klei mrâo điện tử Đảng Cộng sản Việt Nam lŏ dơ̆ng hưn mthâo lu klei mrâo, hră m’ar kñăm mtô mblang, hưn mthâo, đru kơ ƀĭng dlăng hră thâo săng kluôm hĭn kơ klei hdĭp, hdră mă bruă mơ̆ng Khua gĭt gai Hồ Chí Minh lehanăn Mnơ̆ng yuôm bhăn ñu lui leh. Mbĭt anăn, hưn lač dŭm klei yăl dliê jăk, gru mngač êdah êdi, mjing ai lar bra lehanăn mtrŭt mđĭ hdră bi lông khăp čiăng kơ lăn čar, tui hriăm lehanăn hluê ngă klei mĭn, knhuah hdĭp lehanăn knhuah mă bruă mngač Hồ Chí Minh./.

                                                    Pô mblang: H’Nêč Êñuôl