Hlam mlam hrue 19/7 mtam, Sang mđung asăp, mđung rup NHK Japon mđung mtam klei čih hŏng mmông sui bi êdah kơ jih bruă knuă prŏng prĭn mơ̆ng khua gĭt gai Đảng Nguyễn Phú Trọng hlăm bruă rŭ mdơ̆ng, răng mgang, lehanăn mđĭ kyar lăn čar Việt Nam, mbĭt hŏng anăn mâo klei bi mguôp kjăp atăt klei bi hgŭm hŏng ala tač êngao hlăam anăn mâo lăn čar Japon. Dŭm klei čih lehanăn rup mơ̆ng dŭm ala čar mâo bi lar, lač kơ khua gĭt gai mâo ngă leh ti dŭm anôk bruă prŏng, ti dŭm klei bi tuôm hŏng khua mil čhil Mi Joe Biden, klei bi tuôm hŏng khua gĭt gai China Tập Cận Bình, bi tuôm hŏng khua knŭk kna Japon Abe Shinzo…

Hlăm klei čih mñă: “Khua gĭt gai Đảng Nguyễn Phú Trọng jing khua gĭt gai prŏng, găn leh bruă ngă yuôm bhăn, ñu jing leh mnuih ktuh êyuh jih ai tiê hlăm bruă bi kdơ̆ng hŏng klei ƀơ̆ng ngăn ti Việt Nam, jhŏng mghaih msir ktang hlei khua prŏng ƀơ̆ng ngăn wăt hlăm jih bruă kđi čar. Kơ klei mjĕ mgiăm hŏng ala tač êngao, êjai dlông rŏng lăn dôk bi kah mâo dua nah mdê mdê, ƀiădah ñu tui tiŏ nanao hdră êlan bi mguôp hŏng jih jang, lu tĭng čiăng jing mah jiăng jăk nanao hŏng djăp ala čar lehanăn krĭng lăn. Klei bi mguôp hŏng ala čar Japon, klei čih lŏ bơ̆k bâo klei Khua gĭt gai bi tuôm hŏng khua knŭk kna Abe Shinzo. Tinăn, dua čô khua gĭt gai lŏ mñă sa blư̆ dơ̆ng pŏk mlar klei bi hgŭm dua nah. Hră klei mrâo duh mkra Japon (Nikkei) ăt hưn dŭm klei msĕ si NHK hưn leh bi êdah lu mta bruă yuôm bhăn mơ̆ng khua gĭt gai Đảng duh myơr leh kơ bruă mđĭ kyar klei duh mkra ti Việt Nam, hlăm anăn mñă hĭn kơ bruă djŏ tuôm hŏng klei Việt Nam mâo klei kuôl kă duh mkra mnia mblei êngiê hŏng lu ala čar, lehanăn mñă: "Khua gĭt gai jing mnuih pŏk leh kơ klei duh mkra Việt Nam mâo klei đĭ kyar pral”./.