Ba anak nao sang hră hruê tal êlâo ti sang hră hđeh điêt Sao Mai - hdră bruă mơ̆ng Binh đoàn 15 (Phŭn bruă lĭng kahan) mrâo mđup brei kơ phung hđeh ti să Ia Krel, khua mduôn Rah Lan Vọng ti ƀuôn Ngol Le amâodưi mdăp ôh klei hơ̆k mơak. Sang hră mrâo kdrưh kơăm, 5 adŭ hriăm krip, mbĭt hŏng sang pui, anôk mjuăt asei mlei, tač hlăp lêñ, gara… djăp anôk hlăm lêñ kơ 300 čô hđeh, mâo mnơ̆ng hlăp lêñ, jing klei hmăng hmưi mơ̆ng phung hđeh ti dŭm ƀuôn êlan knông lăn. Mduôn Rah Lan Vọng brei thâo, anei amâo djŏ knŏng jing klei hmăng hmưi mơ̆ng phung hđeh điêt ƀiădah wăt phung prŏng, kyua dưi hơĭt brei anak nao sang hră leh anăn nao mă bruă knuă, đru rơ̆ng kjăp klei hơĭt ti krĭng knông lăn:

Sang hdră kdrưh kơăm, doh, siam, anak čô hmei dưi nao sang hră truh hnơ̆ng, êdei dih đru kơ lăn čar. Hmei hơ̆k mơak đăo knang kơ Đảng leh anăn Knŭk kna, kyua mâo klei uêñ mĭn, kriê dlăng kơ phung hđeh, jăk êdi kơ êdei anăp phung hđeh êdei dih”.

Amâo djŏ knŏng ti Ia Krel, ti 2 să Ia Mơ, Ia Púch, Ia Pnôn, Ia Nan, Ia Dom, Ia Chia leh anăn Ia O, čar Gia Lai phŭn rŭ mdơ̆ng sang hră Knŭk kna rông ba mlir gưl hriăm gưl 1 leh anăn gưl 2 hŏng 212 adŭ hriăm, ênoh duh bi liê 1.516 êklai prăk. Hluê si klei mkra mjing, dŭm sang hră dưi rŭ mdơ̆ng hrăm mbĭt hŏng ênŭm dŭm adŭ hriăm, mkŏ mjing wăl hriăm hră mơar hơĭt kjăp kơ êbeh 7.000 čô hđeh sang hră, lu hĭn jing hđeh sang hră mnuih djuê ƀiă. Adei Rơ Châm Lan Thúy, adŭ 8D, sang hră gưl 1 Phan Bội Châu (să Ia Nan) brei thâo:

“Kâo ƀuh hơ̆k mơak kyua leh anei dưi hriăm aguah tlam. Sang hră lŏ mâo dŭm adŭ hriăm mkăn, hmei dưi hlăp lêñ leh anăn ngă klei lông dlăng hoá học, vật lý, dưi huă yang hruê, mdul ƀiă kơ amĭ ama hriê drông”.

Ară anei, Gia Lai mâo giăm 200.000 čô hđeh sang hră mnuih djuê ƀiă dôk hriăm hlăm dŭm gưl, lu jing anak čô mnuih Jarai, Bahnar, Hrê… Phạm Văn Nam – Khua knơ̆ng bruă sang hră mơar čar brei thâo, čiăng mđĭ hnơ̆ng jăk bruă mtô leh anăn hriăm krĭng mnuih djuê ƀiă leh anăn krĭng knông lăn, čar dôk bi leh bruă mkŏ mkra bruă sang hră mơar leh anăn mkŏ mjing hdră êlan djŏ guôp kơ phunug nai djŏ hŏng boh sĭt alŭ wăl. Mbĭt hŏng anăn, anăp anei, knơ̆ng bruă srăng hưn mdah hŏng Bruă sang čư̆ êa čar mâo hdră êlan đru kơ phung hđeh sang hră dleh dlan, mbĭt anăn bi hơĭt klei đru čiăng kơ phung nai hơĭt ai tiê mă bruă ti krĭng tlaih kbưi.

Nao mbĭt hŏng dŭm hdră êlan, čar ăt dôk hluê ngă hdră mđĭ hnơ̆ng jăk sang hră Knŭk kna rông ba leh anăn sang hră mâo anôk mdei yang hruê wưng thŭn 2025 - 2030 čiăng rơ̆ng kơ ênoh hđeh leh anăn pŏk mlar klei găl hriăm hră kơ hđeh sang hră ƀun ƀin, giăm ƀun.

“Anei jing hdră êlan mơ̆ng Đảng leh anăn Knŭk kna hlăm bruă mđĭ klei thâo mnuih ƀuôn sang, mtô mjuăt bi hriăm mnuih mă bruă tinăn mtam, boh nik jing ai dưi kơ krĭng mnuih djuê ƀiă, krĭng knông lăn. Hŏng hdră êlan mđĭ hnơ̆ng jăk bruă kđi čar nah gŭ, bi kjăp hdră êlan djuê ana, bi kjăp klei bi mguôp, krơ̆ng kjăp klei hơĭt leh anăn klei êđăp ênang krĭng knông lăn.”

Dŭm sang hră kdrưh kơăm ti krĭng mnuih djuê ƀiă leh anăn krĭng knông lăn brei ƀuh klei uêñ mĭn kơ bruă sang hră mơar mơ̆ng Đảng leh anăn lăn čar drei. Anei jing anôk knang kjăp kơ phung hđeh sang hră mnuih djuê ƀiă dưi hriăm hră mơar, đru mguôp mkŏ mjing krĭng knông lăn hơĭt kjăp, đĭ kyar ti Gia Lai.