VOV4.Êđê - Hlăm klei kƀĭn tal 16, Dhar bruă gĭt gai bruă kƀĭn ala brei boh blŭ kơ bruă mprăp kơ klei kƀĭn tal 4 mơ̆ng bruă kƀĭn ala. Dhar bruă gĭt gai bruă kƀĭn ala bi tŭ ư klei kƀĭn tal 4, bruă kƀĭn ala gưl 15 srăng kčưm pŏk hruê 20/10 leh anăn bi ruê̆ ti tlam hruê 15/11. Kluôm mmông bi kƀĭn mĭn tĭng jing 21 hruê hluê si ai tiê hnơ̆ng tŭ jăk jing tal êlâo hĭn, ƀiădah mkiêt mkriêm mmông kƀĭn leh anăn kƀĭn mbĭt ti sang bruă kƀĭn ala. Khua kiă kriê adŭ bruă kƀĭn ala Bùi Văn Cường brei thâo: Mĭn tĭng bruă kƀĭn ala srăng dăp klei ksiêm êmuh hlăm 2 hruê mkrah, mơ̆ng tlam hruê 3 truh kơ hruê 5/11 leh anăn ngă bruă mnuih mă bruă mơ̆ng phŭn klei kƀĭn. Bruă kƀĭn ala ăt mkăp 1 hruê mkrah bi trông ti anôk bi kƀĭn kơ boh sĭt bruă duh mkra ala ƀuôn leh anăn ngăn prăk. Khua bruă kƀĭn ala Vương Đình Huệ brei thâo: Klei bi trông kơ bruă duh mkra ala ƀuôn leh anăn hdră klei bhiăn yua lăn (mkra mlih) srăng iêo jak khua gĭt gai 63 čar, ƀuôn prŏng nao hgŭm, hmư̆ klei bi trông leh anăn mbah jing 2 gưl. Dhar bruă gĭt gai bruă kƀĭn ala mtă amâo mâo dưi ngă ngơi mang, srăng ngă jăk bruă gang mkhư̆ klei ruă tưp rơ̆ng klei êđăp ênang hlăm klei kƀĭn tal 4, bruă kƀĭn ala gưl 15.

VOV TâyNguyên/Pô mblang: Y-Ƀel Êban