VOV4.Êđê - Hluê si klei kčah mtrŭn mơ̆ng Phŭn bruă Sang hră m’ar mtô bi hriăm, mơ̆ng hruê anei, 4/5, phung hđeh hlăm kluôm ala čar mphŭn bi mklă hră m’ar mprăp bi lông hriăm jih gưl tlâo thŭn 2022. Klei bi lông hriăm jih gưl tlâo srăng mkŏ mjing hlăm 2 hruê, hruê 7 lehanăn 8/7/2022. Anei jing thŭn tal êlâo, phung hđeh adŭ 12 bi mklă hră m’ar mprăp kơ klei bi lông hluê hdră online kluôm dhuôm (Grăp thŭn dưi ruah hdră onlineamâo dah klă anăp). Hluê anăn, phung hđeh hriăm adŭ 12 thŭn 2021-2022 hluê ngă hdră bi mklă êlan online mơ̆ng hruê anei, 4/5 truh kơ 5h tlam 13/5 ti hla pŏk web kriê dlăng klei bi lông https://thisinh.Thitotnghiepthpt. edu.vn. Phung hđeh ăt dưi bi mklă hluê hdră klă anăp hŏng pŏk m’ar bi mklă msĕ grăp thŭn; anôk bi mklă mâo Knơ̆ng bruă Sang hră m’ar mtô bi hriăm dŭm alŭ wăl kčah mtrŭn. Tơdah mâo klei ka săng, kpăk đuôm, phung hđeh dưi nao êmuh phung nai mtô ti sang hră amâo dah iêu kơ êlan đĭng blŭ đru brei mrô 1800 8000 gư̆ mrô 2./.

H’Nêč pô mblang