VOV4.Êđê- Aguah anei ti Hà Nội, mkŏ mjing leh klei bi kƀĭn kơ bruă hlue ngă hdră mtrŭn 06 mơ̆ng phŭn bruă kđi čar hrue 24/1/2022 “Kơ klei čuăl mkă rŭ mdơ̆ng kiă kriê, lehanăn mđĭ kyar kjăp ƀuôn prŏng Việt Nam truh thŭn 2030, lehanăn tă hdră truh kơ thŭn 2045”. Tui si knơ̆ng bruă ksiêm yap, hnơ̆ng ênoh đĭ jing ƀuôn prŏng ti Việt Nam thŭn 2010 jing 30,39%, truh thŭn 2020 jing 36,8%. Klei mđĭ kyar ƀuôn prŏng pral hĭn ti dua krĭng duh mkra ala ƀuôn anăn jing krĭng Dap Mnai krông Hồng, lehanan krĭng Ngŏ kwar Dhŭng, ƀiă hĭn jing hlăm krĭng kngư čư̆ čhiăng nah Dưr. Klei mđĭ kyar ƀuôn prŏng mjing leh klei găl kơ bruă mđĭ kyar klei duh mkra mnia mblei, mkŏ wĭt bruă duh mkra lehanăn dăp mnuih ngă bruă hlue hŏng hdră mđĭ kyar ênuk mrâo, klei mđĭ kyar ƀuôn prŏng ăt ktŭng ba klei mđĭ kyar krĭng ƀuôn sang. Siămdah, mbĭt hŏng klei jăk dưi ngă snăn ăt adôk mâo mơh lu bruă awăt êdu hlăm klei mđĭ kyar ară anei... boh sĭt dưi ƀuh dŭm dhar bruă djŏ tuôm bi mâo hdră mđrăm hlăm jih jang pioh kơ bruă mđĭ kyar ƀuôn prŏng dưi ngă hŏng klei jăk, ksiêm duah dŭm klei bhiăn hdră êlan mă bruă bi djŏ hŏng klei mđĭ kyar ƀuôn prŏng./.

         Pô mblang: Y-Khem Niê