VOV4.Êđê - Hruê anei 16/2, 51 čar, ƀuôn prŏng mphŭn pŏk knăm jao, tŭ mă kahan hlăm kluôm ala, thŭn 2022 hŏng ai tiê pral, êđăp ênang, ngă jăk hdră gang mkhư̆ klei ruă tưp. Wăt tơdah bruă hrŏng ruah leh anăn iêô mthưr phung êdam êra mŭt kahan mkŏ mjing hlăm boh klei ruă Covid-19 dleh ktuê dlăng, ƀiădah dŭm alŭ wăl hlăm kluôm ala bi leh 100% hnơ̆ng kčah ruah leh anăn iêô nao mŭt kahan thŭn 2022 hŏng hnơ̆ng jăk, lu phung êdam êra djŏ ruah thŭn anei mâo klei suaih pral mrô 1, mrô 2. Čiăng rơ̆ng hnơ̆ng jăk ruah kahan, Anôk bruă kahan (Dhar bruă đru kčĕ kơ lĭng kahan yang ƀuôn Việt Nam) ngă leh jăk bruă kčĕ, dŭm anôk bruă alŭ wăl brei păn kjăp boh klei, pŏk ngă mdrăm mbĭt dŭm hdră msir, mbruă hlăm klei gĭt gai, jih ai tiê amâo brei klei ruă tưp hmaĭ truh kơ klei ruah kahan. Hlue si hdră kčah, bruă jao kahan srăng mkŏ mjing mơ̆ng hruê anei truh jih hruê 20/2, bi leh gưl jao kahan thŭn anei.

H’Zawut pô mblang