VOV4.Êđê - Aguah anei 23/5, ti sang bruă kƀĭn ala, ƀuôn prŏng phŭn Hà Nội srăng kčưm pŏk klei kƀĭn tal 3, bruă kƀĭn ala gưl 15. Hluê si hdră kčah, klei kƀĭn srăng mkŏ mjing hlăm 19 hruê, mĭn tĭng bi ruê̆ ti hruê 16/06/2022. Anei jing klei kƀĭn klă anăp tal êlâo leh 2 thŭn hmăi amâo mâo jăk mơ̆ng klei ruă tưp Covid-19. Klei kƀĭn tal 3, bruă kƀĭn ala gưl 15 mkŏ mjing hlăm wưng kluôm ala dôk hluê ngă ktang phĭt, kluôm êlam, mâo boh tŭ dưn hdră êlan gang mkhư̆ klei ruă tưp Covid-19 leh anăn krŭ wĭt, mđĭ kyar bruă duh mkra ala ƀuôn, boh nik jing klei kƀĭn tal 5 mơ̆ng êpul khua bruă Đảng gưl dlông gưl 13 mrâo bi ruê̆ jăk siam, ba wĭt boh kdrŭt mtrŭt mđĭ bruă hluê ngă tŭ jing hdră mtrŭn klei kƀĭn bruă Đảng gưl 13 mơ̆ng Đảng hlăm wưng mrâo. Hlăm klei kƀĭn, bruă kƀĭn ala ksiêm dlăng, bi klă 5 hdră čih mkra klei bhiăn, 3 hdră čih mkra hdră mtrŭn leh anăn brei klei blŭ hŏng 6 hdră čih mkra klei bhiăn mkăn. Bruă kƀĭn ala ăt mkăp lu mmông čiăng bi klă dŭm boh klei hlăm bruă duh mkra – ala ƀuôn, ngăn prăk ala čar leh anăn bi klă lu boh klei yuôm bhăn mkăn hlăm ala čar.

Y-Ƀel pô mblang