VOV4.Êđê - Hruê mbruê, knơ̆ng bruă dhar kreh, mjuăt ktang asei mlei leh anăn hiu čhưn ênguê čar Lâm Đồng mkŏ mjing leh klei kƀĭn bruă klei mrâo ba mdah hruê kăm mah bruă hiu čhưn ênguê čar Lâm Đồng thŭn 2022. Hruê kăm anei dưi mkŏ mjing ti ƀuôn prŏng Đà Lạt mơ̆ng hruê 21 truh kơ jih hruê 30/4 hŏng dŭm hdră msĕ si: anôk răng mdah leh anăn hưn mdah bruă hiu čhưn ênguê, hưn mdah dŭm mta mnơ̆ng ƀơ̆ng jăk yâo Đà Lạt, dŭm mta mnơ̆ng dhơ̆ng bruă lŏ hma, dhar kreh dŭm djuê ana hlăm čar, hdră êlan mtrŭt mđĭ bruă hiu čhưn ênguê “hruê mah leh anăn mmông mah” mơ̆ng dŭm knơ̆ng bruă…

Anei jing bruă dhar kreh – hiu čhưn ênguê, klei huă ƀơ̆ng leh anăn mjuăt ktang asei mlei kñăm hưn mdah, iêo thưr phung tuê hriê ti Đà Lạt – Lâm Đồng leh anăn kriê pioh, bi lar dŭm mta knhuah dhar kreh dŭm djuê ana, krŭ wĭt leh anăn mđĭ kyar dŭm ƀuôn ngă bruă mâo mơ̆ng đưm nao mbĭt hŏng bruă hiu čhưn ênguê. Hluê anăn, đru mtrŭt mđĭ bruă hiu čhưn ênguê kơ čar Lâm Đồng, hŏng mta kñăm iêo mthưr êbeh 5 êklăk gưl čô tuê hiu čhưn ênguê hlăm thŭn anei.

Y-Ƀel pô mblang