Bruă ngă anei đru kơ anôk bruă duh mkra, êpul hgŭm bruă, phung ngă lŏ hma kluôm ala mkŏ mnia blei leh anăn ba čhĭ mnơ̆ng dhơ̆ng tŭ dưn. Hruê kăm mnơ̆ng dhơ̆ng OCOP leh anăn mnơ̆ng dhơ̆ng mdê hjăn dŭm krĭng kwar thŭn 2023 mâo 439 anôk bruă duh mkra hgŭm hŏng giăm 1.200 mnơ̆ng dhơ̆ng, hlăm anăn OCOP mâo 756 mta mnơ̆ng mơ̆ng 3 truh 5 mtŭ. Hlăm jar hruê kăm lŏ mkŏ mjing bruă bi hgŭm ba yua klei kreh knhâo kdrăp mrâo kơ lŏ hma leh anăn mđĭ kyar krĭng ƀuôn sang; mjing klei găl kơ anôk bruă duh mkra ƀuôn prŏng Hồ Chí Minh leh anăn dŭm čar, ƀuôn prŏng duah, bi liê dŭm hdră bruă lŏ hma ba yua kdrăp mrâo, mguôp hŏng mkra mjing êlam dŭm mta mnơ̆ng dhơ̆ng lŏ hma mdê hjăn mơ̆ng 38 čar, ƀuôn prŏng. Mơ̆ng anăn, bi mklă bruă klam mkŏ tŭ dưn, mtrŭt bruă mnia blei yuôm bhăn mơ̆ng ƀuôn prŏng Hồ Chí Minh hlăm bruă lŏ hma mơ̆ng dŭm krĭng hlăm kluôm ala.

Aguah mbruê 27/10, ti Hà Nội, Anôk bruă mtrŭt mđĭ klei mnia mblei boh mnga lŏ hma, Phŭn bruă lŏ hma leh anăn mđĭ kyar krĭng ƀuôn sang bi mguôp hŏng adŭ bruă gĭt gai krĭng ƀuôn sang mrâo gưl dlông, êpul hgŭm phung mkra êa msĭn knhuah gru Việt Nam mkŏ mjing hruê knăm hưn mdah, mkŏ mnơ̆ng ƀơ̆ng huă Việt Nam kơ dŭm mta mnơ̆ng dhơ̆ng êa msĭn knhuah gru, dŭm mta mnơ̆ng ƀơ̆ng phŭn krĭng kwar.

Anei jing wưng hưn mdah, hâo hưn kơ dŭm klei yăl dliê mnơ̆ng dhơ̆ng, hdră mkra mjing dŭm mta êa msĭn leh anăn mnơ̆ng ƀơ̆ng mơ̆ng êa msĭn Việt Nam truh kơ phung blei ba yua knăm mđĭ klei thâo săng, djăp pioh êa msĭn knhuah gru leh anăn dŭm knhuah dhar kreh phŭn mơ̆ng Việt Nam hŏng phung tuê hiu čhưn ênguê hlăm leh anăn êngao lăn čar. Hruê kăm dôk hlăm dŭm bruă klam mơ̆ng hdră ala čar kñăm mkŏ mkra krĭng ƀuôn sang mrâo thŭn 2023, đru mtrŭt mđĭ klei mnia mblei, mkŏ klei mkăp brei ba čhĭ êa msĭ leh anăn mnơ̆ng ƀơ̆ng mơ̆ng êa msĭ.