Hdră bruă anei mơ̆ng Phŭn bruă dhar kreh, mjuăt asei mlei leh anăn hiu čhưn ênguê bi mguôp hŏng đa đa Phŭn, dhar bruă gưl dlông leh anăn 5 čar krĭng Lăn Dăp Kngư mâo Kon Tum, Gia Lai, Dak Lak, Dak Nông, Lâm Đồng mkŏ mjing. Hŏng akŏ “Cư̆ čhiăng krĭng Lăn Dăp Kngư – klei jăk yâo bi mklin”, hlăm 3 hruê knăm mơak, mkŏ mjing mư̆ng 29/11 – 1/12 ti ƀuôn prŏng Kon Tum leh anăn dŭm kdriêk ti čar Kon Tum. Đăo tĭng, nao hlăm knăm mơak srăng mâo hlăm brô 1.000 čô thâo bruă, phung kdŏ mmuñ, phung bi lông.

Nao hlăm knăm mơak, mnuih ƀuôn sang leh anăn phung tuê srăng dưi ñŭ kma mbĭt hŏng wăl dhar kreh čĭng čhar krĭng Lăn Dăp Kngư, ktuê dlăng dŭm klei bi lông mơ̆ng phung mniê êra, êkei êdam hlăm dŭm mta klei mjuăt asei mlei, ktuê dlăng klei siam wăl hdĭp, anak mnuih mơ̆ng krĭng lăn Dưr Lăn Dap Kngư Kon Tum hŏng dŭm tour hiu čhưn ênguê.