VOV4.Êđê - Hruê 25/2, Knơ̆ng gĭt gai lĭng kahan răng mgang knông lăn čar Dak Lak bi hgŭm hŏng kdriêk Êa Sup mkŏ mjing Hruê m’ak jih jang mnuih ƀuôn sang răng mgang knông lăn thŭn 2022 ti să knông lăn Ia Rvê. Čar Dak Lak mâo êlan knông lăn êbeh 73 km siă knông hŏng čar Mondulkiri, Campuchia. Krĭng knông lăn čar Dak Lak mâo 4 să hŏng 51 alŭ, ƀuôn hlăm 2 kdriêk Ƀuôn Đon lehanăn Êa Sup, jing anôk dôk hdĭp mơ̆ng êbeh 22 êbâo čô mnuih hlăm 26 djuê ana.

Dŭm thŭn êgao, dŭm gưl bruă Đảng, bruă sang čư̆ êa alŭ wăl bi hgŭm leh kjăp hŏng Lĭng kahan răng mgang knông lăn krơ̆ng kjăp klei kluôm ênŭm krĭng lăn, răng mgang kjăp klei êđăp ênang ala čar ti alŭ wăl. Klă klơ̆ng, ti dŭm să knông lăn mâo leh 26 êpul êya, êbeh 480 gŏ sang, êbeh 1.600 čô mnuih nao hgŭm răng mgang êlan, gơ̆ng knăl krĭng knông lăn, ƀuăn srăng bi kdơ̆ng hŏng phung ngă soh, klei truh jhat hlăm yang ƀuôn./.

H’Nêc pô mblang