Djă ti kngan boh tŭ dưn klei mkă dlăng êrah, mkă kboh, siêu âm leh klei mkă dlăng klei suaih pral mơ̆ng êpul phung aê mdrao sang êa drao biăm kkuê gưl dlông ti krĭng 4 kahan êa, amai Phạm Thị Thoa, mô̆ sa čô knuă druh kahan êa dôk ngă bruă krĭng 4, ƀiădah ñu ƀuh hĕ hlăm ñu mâo klei ruă biăm kkuê ti mta ruă ktrŏ, leh bliah mdrao, klei suaih pral ñu hơĭt hĭn leh. Amai Thoa lač:

Msĕ si yang đar nao mkă dlăng klei ruă ti anôk kbưi, ară anei mâo leh phung aê mdrao hriê mkă dlăng knŏng luič mă sa aguah, dah msĕ si yăng đar jing truh sa hrue kăm mtam. Bruă phung aê mdrao ngă bŏ hŏng klei yuôm bhăn, đru leh kơ mnuih ƀuôn sang ti Khánh Hòa tinei.

Hlăm dŭm hrue mkŏ mjing klei mkă dlăng klei suaih pral, Trung tá Nguyễn Hữu Nhất, khua kiă kriê nai êa drao kahan Sư đoàn 377, kahan wăl adiê mbĭt hŏng jih jang ƀĭng kahan truh hnưm ti êpul nai êa drao kahan mrô 486:

Mơ̆ng klei hriê mkă dlăng tinei, mâo phung aê mdrao hur har jih ai tiê, kčĕ đru jăk sơnăk, êpul knuă druh lĭng kahan ti êpul êya anei hơĭt ai tiê ngă bruă pô.

Mâo leh lu thŭn hŏng anei, grăp thŭn, phung khua kiă kriê sang êa drao biăm kkuê gưl dlông mbĭt hŏng êpul ngă bruă truh dŭm pluh čô nai aê mdrao mơ̆ng dŭm boh sang êa drao hriê bi đru mkă dlăng mdrao mgŭn kơ phung knuă druh, lĭng kahan ti kđông kahan Cam Ranh lehanăn mnuih ƀuôn sang ti ƀuôn hgŭm Cam Nghĩa lehanăn kdriêk Cam Lâm, čar Khánh Hòa. Boh nik, hlăm thŭn 2020, sang êa drao mâo đru mdơ̆ng brei leh anôk mkă dlăng mdrao mgŭn sang êa drao kahan Lữ đoàn 101, kahan êa krĭng 4 ti să Cam Thành Bắc, kdriêk Cam Lâm. Truh kơ ară anei, anôk mkă dlăng mdrao mgŭn ti sang êa drao kahan Lữ đoàn 101 jing leh anôk jăk êdi kơ lĭng kahan lehanăn mnuih ƀuôn sang hlăm alŭ wăl grăp blư̆ tuôm hŏng klei ruă duam nao mbăng. Cao Quốc Khánh mnuih ƀuôn sang ti să Cam Bình, ƀuôn prŏn Cam Ranh lač:

Phung aê mdrao tinei hur har êdi, dlăng kriê mnuih ruă jăk snăk, ktrâo atăt hlăm grăp boh adŭ đih mdrao, hlăm djăp mta klei, grăp mlan kâo truăn hriê mkă dlăng hnơ̆gn êrah đĭ. leh mâo sang êa drao kahan Lữ đoàn 101 tinei, jing leh anôk jăk tal êlâo kâo mâo anôk găl hriê mkă dlăng suaih pral pô. Leh truh kơ anei hơĭt ai tiê snăk.

Mơ̆ng bruă ngă tal êlâo hŏng klei êdu êun, bŏ hŏng klei khăp, lehanăn hŏng ênoh mnuih ruă hriê mdrao hlăm grăp thŭn knŏng mil hlăm brô 3 čô mnuih, leh mâo klei đru hlăm jih jang bruă, hlăm klei mdrao mgŭn, kdrăp mă bruă mâo mkăp leh mơ̆ng sang êa drao biăm kkuê gưl dlông, snăn grăp thŭn. Sang êa drao kahan Lữ đoàn 101 mâo mkă dlăng mdrao mgŭn leh kơ 18 êbâo čô mnuih ruă. Mbĭt hŏng anăn, dŭm boh sang êa drao gưl dlông mâo tiŏ nao leh lu phung aê mdrao truh nao đru hlăm bruă knuă, nao mtô bi hriăm klei djă yua kdrăp mdrao mgŭn mrâo, đru mtô bi hriăm phung aê mdrao ti sang êa drao kahan mdrao mgŭn, hŏng klei bi đru, bi êdah ai tiê klei khăp mbĭt hŏng jih jang kahan êa Việt Nam hlăk dôk hlăm krĭng êa ksĭ plao ksĭ taih kbưi mâo klei dưi dlăng kriê jăk kơ klei suaih pral, mơ̆ng anăn, mâo klei thâo bi mguôp kjăp plah wah lĭng kahan lehanăn mnuih ƀuôn sang Việt Nam.