Hŏng 135 gŏ êsei, mnuih djuê ana Gié - Triêng ti alŭ Dục Nhầy 1, să knông lăn Đăk Dục, kdriêk Ngọc Hồi, čar Kon Tum, snăn phung knhuă druh, kahan răng mgang knông lăn kđông Dục Nông dlăng msĕ si mnuih hlăm gŏ sang sa găp djuê. A Luật, sa čô mnuih hlăm alŭ brei thâo: Mnuih ƀuôn sang mâo sa ai tiê klei khăp jăk snăk hŏng kahan răng mgang knông lăn.

 “Kđông mâo klei mđing uêñ hŏng mnuih ƀuôn sang, gŏ êsei dleh dlan. Đru rông ba phung hđeh điêt êrĭt êrin. Mâo nanao klei mđing uêñ hŏng mnuih ƀuôn sang ti să Đăk Dục. Kâo ƀuh phung kahan răng mgang knông lăn tinei thâo jĕ giăm snăk”.

3 thŭn êgao êpul khua kiă kriê kđông kahan răng mgang knông lăn Dục Nông tiŏ nao leh Thiếu tá Dương Văn Lương nao bi mguôp hŏng êpul bruă Đảng hlăm alŭ, dưn yua jih ai tiê bruă klam mơ̆ng sa čô kahan răng mgang knông lăn hŏng Đảng, hŏng mnuih ƀuôn sang. Aduôn Xiêng Thị Tuý, Khua bruă Đảng alŭ, hlŏng jing khua alŭ Dục Nhầy 1 brei thâo thiếu tá Dương Văn Lương đru kčĕ leh lu hlăm bruă knuă mơ̆ng êpul bruă Đảng mâo leh dŭm hdră êlan mă bruă jăk mơ̆ng klei mkŏ mjing Đảng lehanăn mđĭ kyar klei hdĭp mda mnuih ƀuôn sang. Mơ̆ng akŏ wưng păn bruă truh kơ ară anei, êpul bruă Đảng alŭ Dục Nhầy 1 mâo lŏ bi mŭt leh 2 đảng viên mrâo mđĭ ênoh jih jang phung đảng viên hlăm êpul bruă Đảng truh 19 čô, ênoh gŏ êsei kluôm alŭ hrŏ adôk 6 gŏ êsei đuič:

“Dương Văn Lương hur har jih ai tiê đru hlăm bruă mkŏ mjing, đru kơ êpul bruă Đảng mkŏ mjing hdră mă bruă, mâo dŭm hdră êlan kơ êpul bruă Đảng mă bruă jăk hĭn, lu hdră hĭn kñăm iêo jak đảng viên. Êngao kơ bruă snăn Dương lŏ jih ai tiê đru kơ mnuih ƀuôn sang mâo klei thâo bi mguôp hĭn. Mơ̆ng anăn lĭng kahan lehanăn mnuih ƀuôn sang mâo lŏ mđĭ hlăm êpul bruă Đảng dưi djăp jing êpul bruă Đảng doh mngač kjăp ktang, lehanăn amâo mâo gŏ êsei lĕ hlăm klei ngă soh hŏng klei bhiăn”.

Hyuă kjăp klei thâo bi mguôp lĭng kahan hŏng mnuih ƀuôn sang, mkŏ mjing ai tiê mprăp kơ klei bi blah hlăm mnuih ƀuôn sang mtam hŏng klei kjăp, mơ̆ng thŭn 2020 truh kơ ară anei knơ̆ng kiă kriê kahan răng mgang knông lăn čar   Kon Tum mâo tiŏ nao leh phung khua kahan, lĭng kahan truăn kơ bruă ti dŭm boh kđông đru bi kjăp jih jang bruă hlăm 13 boh să ti knông lăn bi knông hŏng ala čar Lao lehanăn Campuchia. Hlăm anăn, mâo 4 čô knuă druh mŭt hlăm êpul khua kiă kriê bruă Đảng kdriêk, 13 čô mŭt hlăm êpul bruă Đảng 13 boh să, 17 čô knuă druh mâo ruah mŭt hlăm êpul gơ̆ng bruă ƀuôn sang gưl čar, kdriêk, să...

Trung tá A Ngọc Chiến, ti kđông răng mgang knông lăn Đăk Nhoong mâo leh knơ̆ng kiă kriê kahan răng mgang knông lăn čar Kon Tum tiŏ nao đru klam ngă k’iăng khua bruă Đảng, khua êpul ksiêm dlăng knông lăn Đăk Nhoong, kdriêk Đăk Glei, čar Kon Tum lač, mbĭt hŏng dŭm gưl êpul bruă Đảng să bi kjăp, mkŏ mjing êpul bruă Đảng kjăp ktang, ñu mâo nanao hdră êlan kăp dru mnuih ƀuôn sang lăm lui jih klei bhiăn amâo mâo lŏ djŏ hlăm ƀuôn sang, lehanăn đru kơ mnuih ƀuôn sang hlăm klei duh ƀơ̆ng:

 “Kâo đru kčĕ kơ êpul bruă Đảng mâo hdră êlan kiă kriê lehanăn gĭt gai knơ̆ng bruă sang čư̆ êa, bruă mặt trận lehanăn dŭm êpul bruă kđi čar yang ƀuôn sa ai tiê bi hlue ngă dŭm hdră êlan mđĭ kyar klei hdĭp mda, boh nik hlăm bruă lăm lui jih klei bhiăn amâo lŏ djŏ, čiăng kơ mnuih ƀuôn sang thâo kpưn đĭ tlaih mơ̆ng klei dleh dlan. Boh nik jing sa knông lăn, alŭ wăl dôk mâo kmrơ̆ng hrông, snăn hmei mâo bruă čoh cuăng bi răng mgang, hlăm anăn mâoi lu mta ana êa drao yuôm hin boh nik jing ana sâm Ngọc linh, lehanăn hmei lŏ mkŏ mjing bruă pla mjing mmao ĭt đru mđĭ kyar klei hdĭp kơ mnuih ƀuôn sang”.

Hlăm dŭm thŭn êgao hŏng ai tiê “kđông jing sang, knông lăn jing ƀuôn, mnuih ƀuôn sang djăp djuê ana jing ayŏng adei sa thŭn k’ŭt” kahan răng mgang knông lăn čar Kon Tum mâo leh lu bruă ngă klă mngač, kñăm hyuă kjăp hĭn klei thâo bi mguôp mnuih ƀuôn sang hŏng lĭng kahan ti knông lăn. Êdah êdịing dŭm gru bi hmô mkŏ mjing ƀuôn sang Đăk Ga, să Đăk Nhoong kdriêk Đăk Glei trei mđao, kjăp ktang, êđăp ênang”, dŭm mta bruă kơ mnuih ƀuôn sang hdĭp msĕ si: Phŭn pui bi êran hŏng êa điêt Đăk Giao/Đăk Long; êa yua čŏng mđoh Bờ Y, Đăk Long, Đăk Blô; bruă ngă klei mjĕ mjing hŏng dŭm gŏ êsei dôk hlăm klei dleh dlan đru kơ digơ̆ tlaih mơ̆ng klei knap mñai, đru kơ 74 čô hđeh dưi nao sang hră mơar, 15 čô hđeh jing anak rông kơ kđông kahan răng mgang knông lăn...

Mơ̆ng klei bi sa ai, klei thâo bi đru mơ̆ng knuă druh, lĭng kahan, truh kơ ară anei mâo leh 7 hlăm êbeh 13 boh să ti knông lăn čar Kontum djăp ênoh čuăn krĭng ƀuôn sang mrâo... Mbĭt hŏng anăn jing klei hdĭp mnuih ƀuôn sang ti krĭng knông lăn čar Kon Tum hlăk dơ̆ng mâo klei bi mlih, snăn ai tiê klei mprăp bi blah mơ̆ng mnuih ƀuôn sang knư̆ hĭn mơh kjăp./.