VOV4.Êđê- Ti anăp klei ruă Covid-19 dleh ktuê dlăng, ênoh F0 đĭ pral hlăm êpul êya, mơ̆ng hruê 1/3, jih jang hđeh sang hră adŭ 9 leh anăn 12 ti ƀuôn prŏng Ƀuôn Ama Thuôt, čar Dak Lak mdei nao sang hră leh anăn lŏ wĭt hriăm online. Dŭm hruê giăm anei, ênoh  Covid-19 ti ƀuôn prŏng Ƀuôn Ama Thuôt lŏ dơ̆ng đĭ, ênoh F0 mdrao ti sang mâo 99% ênoh phung djŏ, Adŭ bruă Sang hră mtô bi hrtiăm ƀuôn prŏng kčĕ kơ Knơ̆ng bruă sang čư̆ êa ƀuôn prŏng bi mlih hdră hriăm ti sang hră leh anăn hriăm online hŏng jih jang gưl hriăm, wăt hđeh adŭ 9 leh anăn 12 mơ̆ng hruê 1/3 êla mâo klei hưn mthâo mrâo.

Čiăng ktuê dlăng tŭ dưn klei ruă tưp leh anăn rơ̆ng hnơ̆ng jăk mtô - bi hriăm, Knơ̆ng bruă sang čư̆ êa ƀuôn prŏng Ƀuôn Ama Thuôt mtă kơ Adŭ bruă sang hră mtô bi hriăm ƀuôn prŏng čih ênoh knuă druh, nai mtô leh anăn hđeh sang hră djŏ Covid-19 êlâo kơ 5 mmông tlam grăp hruê.  Mbĭt anăn gĭt gai bi hgŭm hŏng dŭm anôk bruă djŏ tuôm, kčĕ mkra mlih hdră gang mkhư̆ klei ruă tưp hlăm dŭm sang hră bi djŏ guôp hŏng boh klei mrâo.

Pô mblang: H’Zawut Ƀuôn Yă