Hlăm knăm mơak kčĕ hrŏng ruah, hưn mthâo bruă knuă kơ hđeh sang hră gưl dua, adei Trần Thuỳ Tú, hđeh sang hră adŭ 9D, sang hră gưl 2 Thành Nhất, ƀuôn prŏng Ƀuôn Ama Thuôt mđing hmư̆, čih bi nik leh anăn jhŏng êmuh. Ñu brei thâo:

 “Mơ̆ng knăm mơak kâo thâo săng hĭn kơ hdră kñăm mtô bi hriăm ăt msĕ mơh hriăm bruă ti dŭm Anôk bruă mtô bi hriăm. Anăn srăng mâo sa klei ruah jăk kơ phung hđeh sang hră amâo djăp klei dưi amâodah amâo djăp klei thâo. Phung hđeh srăng mâo klei đĭ kyar čiăng mđĭ kyar ñu pô ăt msĕ mơh hrŏng ruah bruă knuă djŏ guôp hŏng pô hĭn”.

Anei jing thŭn tal êlâo Knơ̆ng bruă Sang hră leh anăn mtô bi hriăm čar Dak Lak mkŏ mjing “Knăm mơak kčĕ hrŏng ruah, hưn mthâo bruă knuă kơ hđeh sang hră gưl 2”. Nai mtô Nguyễn Thị Lương, sang hră gưl 2 Nguyễn Thị Minh Khai, ƀuôn prŏng Ƀuôn Ama Thuôt brei thâo, Hdră bruă “Mtô bi hriăm bruă leh anăn tă hdră mbha hđeh sang hră hlăm klei mtô bi hriăm ti čar Dak Lak wưng 2018 - 2025”  dưi pŏk ngă mơ̆ng sui, ƀiădah lu phung čŏng mkŏ mjing hdră kčah hâo hưn mtô mblang anăn tŭ dưn leh anăn hrăm mbĭt sa ai ka lu. Hlăk êjai hđeh sang hră čiăng hriăm bruă ƀrư̆ hruê ƀrư̆ lu.

 “Mâo đa đa amâo đei pral hriăm hră ôh ƀiădah thâo hriăm kơ bruă mkăn, anăn phung hđeh mđing kơ klei ksiêm hriăm. Msĕ si mmông kčĕ snei hđeh sang hră čih anăn lu snăk, čiăng hgŭm ksiêm hriăm bi nik hĭn kơ dŭm sang hră hriăm bruă gưl krah.”

          Kčĕ kơ klei hrŏng ruah, hưn mthâo bruă knuă kơ hđeh sang hră gưl 2, Đặng Như Thanh, bi ala Sang hră gưl krah Dak Lak lač, anei jing bruă ngă čiăng êdi kñăm đru kơ phung hđeh pral hĭn hlăm klei ksiêm duah leh anăn ruah bruă hriăm djŏ guôp plah wah klei thâo pô hŏng klei čiăng ala ƀuôn. Klei hriăm bruă ăt pŏk kơ phung hđeh klei găl tui hriăm, leh anăn đru bi hrŏ klei bi liê:

          “Phung hđeh hriăm klei hriăm gưl tlâo êjai, hriăm bruă êjai snăn leh 3 thŭn phung hđeh srăng mâo dua hră bi mklă hlăm sa blư̆: hriăm gưl 3 leh anăn hră bi mklă hriăm bruă. Mơ̆ng anăn phung hđeh mâo klei dưi hriăm gưl krah, gưl prŏng čiăng lŏ dơ̆ng ngă klei pô čiăng. Êngao anăn, Knŭk kna ară anei mâo lu hdră êlan đru kơ phung hđeh hriăm bruă êjai hriăm hră êjai, dŭm hdra êlan đru kơ phung hđeh jăk snăk.”

Thŭn 2024 - 2025, Dak Lak mĭn tĭng mâo hlăm brô 31 êbâo čô hđeh sang hră hriăm jih gưl 2, đĭ êbeh 2000 čô hđeh mkă hŏng êlâo. Hlăm ênoh anei hlăm brô 23 êbâo čô hđeh srăng mŭt hriăm hlăm sang hră gưl 3 hlue si hnơ̆ng kčah, êbeh 4000 čô hđeh sang hră ti Anôk mtô bi hriăm jêñ jêñ, adôk srăng nao hriăm bruă hlue si Hdră “Mtô bi hriăm bruă leh anăn tă hdră mbha hđeh sang hră hlăm klei mtô bi hriăm hđeh gưl 3 ti čar Dak Lak wưng 2018 - 2025”. Hlue si Đỗ Tường Hiệp, K’iăng Khua Knơ̆ng bruă sang hră mtô bi hriăm čar Dak Lak, Knơ̆ng bruă dôk mđĭ ktang mkŏ mjing klei hrŏng ruah, hưn mthâo bruă kơ hđeh sang hră gưl 2 čiăng kơ phung hđeh dưi ruah êlan djŏ hŏng pô:

 “Bruă sang hră mtô bi hriăm lŏ dơ̆ng mđĭ klei thâo săng kơ êpul nai mtô, knuă druh kriê dlăng, phung nai mtô, boh nik hđeh sang hră, amĭ ama hđeh sang hră leh anăn kluôm ala ƀuôn thâo kơ klei mbha êpul leh hriăm jih gưl 2 jing yuôm bhăn. Phung hđeh bi mlih klei hdĭp pô, klei pô hriăm hŏng bruă amâo djŏ knŏng êlan hriăm hră mơar ôh ƀiădah hŏng klei hriăm bruă leh anăn dưi mkŏ mjing klei hdĭp êdei anăp hŏng bruă knuă.”

Mơ̆ng bruă mđĭ ktang bruă kčĕ hrŏng ruah, hưn mthâo bruă knuă, čang hmăng hlăm wưng kơ anăp, phung amĭ ama leh anăn hđeh sang hră hriăm jih gưl 2 ti Dak Lak srăng mâo klei ruah djŏ guôp, ñĕ kơ klei bi duah sang hră hriăm msĕ si thŭn hriăm êlâo./.